UK चे पंतप्रधान बोरिस जॉन्सन भारत दौर्‍यावर, आज गुजरातला देणार भेट

नवी दिल्ली, 21 एप्रिल 2022: ब्रिटनचे पंतप्रधान बोरिस जॉन्सन 21 एप्रिल रोजी अहमदाबाद येथून भारत दौऱ्याला सुरुवात करत आहेत. गुजरातला भेट देणारे ते पहिले ब्रिटनचे पंतप्रधान असतील. ते साबरमती येथील गांधी आश्रमालाही भेट देऊ शकतात. यानंतर ते 22 एप्रिल रोजी दिल्लीत पंतप्रधान नरेंद्र मोदी यांची भेट घेणार आहेत. दोन्ही नेते ब्रिटन आणि भारताच्या धोरणात्मक संरक्षण, राजनैतिक आणि आर्थिक भागीदारीवर चर्चा करतील.

याआधीही अनेक परदेशी पाहुणे भारतात आले आहेत, जे दिल्लीशिवाय देशाच्या इतर भागात गेले आहेत, अशी माहिती आहे.

शी जिनपिंग, चीनचे राष्ट्राध्यक्ष: 17 सप्टेंबर 2014 रोजी नरेंद्र मोदी यांनी चीनचे राष्ट्राध्यक्ष शी जिनपिंग यांचे अहमदाबादमध्ये स्वागत केले. शी हे पहिले विदेशी नेते होते ज्यांचे दिल्लीबाहेर स्वागत झाले. अहमदाबादमध्ये, दोन्ही नेत्यांनी साबरमती रिव्हरफ्रंटवर बांधलेल्या पारंपरिक झुल्यावर बसून या दृश्याचा आनंद लुटला.

डोनाल्ड ट्रम्प, अमेरिकेचे माजी राष्ट्राध्यक्ष: फेब्रुवारी 2020 मध्ये अमेरिकेचे तत्कालीन राष्ट्राध्यक्ष डोनाल्ड ट्रम्प यांनी भारताला भेट दिली. त्यानंतर 24 आणि 25 फेब्रुवारी रोजी आयोजित नमस्ते ट्रम्प कार्यक्रमात सहभागी होण्यासाठी अहमदाबादमध्ये त्यांचे स्वागत करण्यात आले.

मार्सेलो रेबेलो डी सौसा, पोर्तुगालचे अध्यक्ष: 2020 मध्ये, 13 ते 16 फेब्रुवारी, पोर्तुगालचे अध्यक्ष, मार्सेलो रेबेलो डी सौसा यांनी मुंबई आणि गोव्याला भेट दिली. तेथे त्यांनी ‘इंडिया पोर्तुगाल बिझनेस फोरम’मध्ये भाग घेतला.

शी जिनपिंग, चीनचे अध्यक्ष: ऑक्टोबर 2019 मध्ये, चीनचे राष्ट्राध्यक्ष शी जिनपिंग आणि पंतप्रधान मोदी यांची तामिळनाडूमधील महाबलीपुरम येथे दुसरी भेट झाली. येथे त्यांनी युनेस्कोच्या काही जागतिक वारसा स्थळांनाही भेट दिली.

इमॅन्युएल मॅक्रॉन, फ्रान्सचे अध्यक्ष: मार्च 2018 मध्ये फ्रान्सचे राष्ट्राध्यक्ष इमॅन्युएल मॅक्रॉन यांनी त्यांच्या भारत भेटीदरम्यान वाराणसीला भेट दिली. वाराणसी हा पंतप्रधान मोदींचा लोकसभा मतदारसंघ आहे.

इवांका, डोनाल्ड ट्रम्प यांची मुलगी: इवांका ट्रम्प 28 नोव्हेंबर 2017 रोजी भारत भेटीवर होती. ग्लोबल आंत्रप्रेन्योरशिप समिटसाठी ती हैदराबादला पोहोचली होती. येथे त्यांचे भव्य स्वागत करण्यात आले.

जस्टिन ट्रूडो, कॅनडाचे पंतप्रधान: फेब्रुवारी 2021 रोजी, कॅनडाचे पंतप्रधान जस्टिन ट्रूडो यांनी अमृतसरमधील सुवर्ण मंदिर, गुजरातमधील साबरमती आश्रम आणि मुंबईला भेट दिली.

शिंजो आबे, जपानचे माजी पंतप्रधान: 13 सप्टेंबर 2017 रोजी जपानचे तत्कालीन पंतप्रधान शिंजो आबे आणि नरेंद्र मोदी अहमदाबादला पोहोचले. येथे त्यांनी सिदी सय्यद मशिदीला भेट दिली, जी गुजरात सल्तनतने आपल्या शासनाच्या शेवटच्या टप्प्यात बांधली होती.

फ्रान्सचे माजी राष्ट्राध्यक्ष फ्रँकोइस ओलांद: 24 जानेवारी 2016 रोजी पंतप्रधान नरेंद्र मोदी यांनी चंदीगडमध्ये फ्रान्सचे माजी राष्ट्राध्यक्ष फ्रँकोइस ओलांद यांचे यजमानपद भूषवले. येथे त्यांनी रॉक गार्डनला भेट दिली.

शिंजो आबे, जपानचे माजी पंतप्रधान: डिसेंबर 2015 मध्ये, पंतप्रधान नरेंद्र मोदी आणि जपानचे तत्कालीन पंतप्रधान शिंजो आबे यांनी सूर्यास्ताच्या वेळी वाराणसीतील दशाश्वमेध घाटावर गंगा आरतीमध्ये भाग घेतला होता.

अँजेला मर्केल, माजी जर्मन चांसलर: 6 ऑक्टोबर 2015 रोजी तत्कालीन जर्मन चांसलर अँजेला मर्केल यांनी भारताला भेट दिली. पंतप्रधान नरेंद्र मोदी आणि मर्केल यांनी बॉशच्या भारतातील ऑपरेशन्सवर पॉवर पॉइंट प्रेझेंटेशन एकत्र पाहिले.

न्यूज अनकट प्रतिनिधी: ईश्वर वाघमारे