पुणे, १० फेब्रुवारी २०२५: पुण्यातील रस्ते खोदकाम आणि अपुऱ्या नियोजनामुळे वाहतूक कोंडीचा प्रश्न दिवसेंदिवस गंभीर होत आहे. मध्यवर्ती भागातील रस्त्यांवर मोठमोठे खड्डे, पाइपलाइन टाकण्यासाठी उखडलेले मार्ग आणि अरुंद रस्त्यांवरील वाहतुकीचा विस्कळीत प्रवाह यामुळे वाहनचालक आणि पादचाऱ्यांना नाहक त्रास सहन करावा लागत आहे.
विद्यार्थी आणि कर्मचाऱ्यांचे हाल
शाळा आणि कार्यालयांच्या वेळेत वाहतूक कोंडीचा मोठा फटका नागरिकांना बसत आहे. शाळकरी मुले वेळेत शाळेत पोहोचू शकत नाहीत, तर कर्मचाऱ्यांना सतत उशीर होत आहे. अरुंद रस्त्यांवरून अवजड वाहतूक सुरू असल्याने विद्यार्थ्यांच्या सुरक्षिततेचा प्रश्न निर्माण झाला आहे.
रुग्णवाहिका आणि आपत्कालीन सेवा अडकल्या
वाहतूक कोंडीमुळे रुग्णवाहिकांसाठी मार्ग मोकळा मिळत नसल्याने अनेक गंभीर रुग्ण वेळेत रुग्णालयात पोहोचू शकले नाहीत. परिणामी, जीवितहानी होण्याची भीती वाढली आहे. अग्निशमन दलाच्या गाड्यांनाही घटनास्थळी पोहोचण्यात अडथळे येत आहेत.
नागरिक संतप्त – प्रशासनाकडे तक्रारींचा पाऊस
वाहतूक पोलिसांकडून प्रभावी नियोजनाचा अभाव असल्याने नागरिक संतप्त झाले आहेत. “महानगरपालिकेने खोदकाम वेळेत पूर्ण करावे आणि वाहतुकीचे नियोजन सक्षमपणे करावे,” अशी मागणी जोर धरू लागली आहे.
“कधी संपेल ही खोदकामाची साखळी?” असा प्रश्न पुणेकर विचारत आहेत. प्रशासनाने त्वरित पावले उचलली नाहीत, तर नागरिकांमधील असंतोष आणखी वाढू शकतो.
न्यूज अनकट प्रतिनिधी सोनाली तांबे
