पुणे-नाशिक महामार्गावर वाहनांच्या लांबच लांब रांगा, बंद पडलेल्या कंटेनरवर दोन टेम्पो आदळले

राजगुरुनगर, २७ जुलै २०२३ : पुणे-नाशिक महामार्गावर राजगुरुनगरलगतच्या चांडोली टोल नाक्याजवळ, बंद पडलेल्या कंटेनरला दोन आयशर टेम्पो धडकून जोरदार अपघात झाला. आज सकाळी सहाच्या सुमारास हा अपघात घटला आहे. दुध वाहतूक करणारे दोन्ही आयशर टेम्पो एकाच गावातील म्हणजेच चांडोली येथील आहेत. पुण्याच्या बाजुने हे दोन्ही टेम्पो राजगुरुनगर बाजूकडे येत होते.

टोल नाक्याजवळ रस्त्यात बंद पडलेल्या कंटेनरवर पहिला टेम्पो धडकला. मागून येणारा त्यावर आदळला. अपघातात वाहनांचे मोठे नुकसान झाले आहे. अपघातात चालक ओंकार सावंत आणि गणेश दांगट गंभीर जखमी झाले आहेत. त्यांना तातडीने भोसरी येथील साईनाथ रुग्णालयात उपचारासाठी दाखल करण्यात आले आहे.

रस्त्यात अपघात होऊन जागेवरच वाहने अडकून पडल्यामुळे भल्या सकाळी वाहनांच्या लांबच लांब रांगा लागल्या होत्या. टोलनाका ते शिरोली परिसरात एक बाजूने वाहतूककोंडी झाली. प्रवासी वाहनचालकांना जवळपास दोन तास जागेवरच वाहने उभी करावी लागली. वाहतूक पोलिस नागरिकांच्या मदतीने वाहने रस्त्यातून बाजूला करत आहेत.

न्युज अनकट प्रतिनिधी : अमोल बारवकर