मुंबई, २७ जुलै २०२३ : महाराष्ट्राच्या ग्रामीण भागाच्या प्रवासाचा कणा म्हणून ओळख असलेल्या, एसटी महामंडळाच्या लालपरीची दुरावस्था दाखविणाऱ्या एका बसचा व्हिडीओ समाजमाध्यमात व्हायरल झाला. यामुळे महाराष्ट्राच्या एसटी महामंडळाच्या ताफ्यातील जुन्या बसेसचा प्रश्न ऐरणीवर आला आहे. मागील काही दिवसांपूर्वीच सांगली आगारातील चालक आणि वाहकाने तारेवरची कसरत करत नादुरुस्त बस प्रवाशांसह आगारापर्यंत आणल्याचा व्हिडीओ व्हायरल झाला होता.
कोरोनाकाळात महामंडळाच्या अनेक बसेस नादुरुस्त झाल्या असून या बसेस तशाच अवस्थेत सेवा देत असल्याचे उघडकीस आले आहे. या प्रकरणी नादुरुस्त बस प्रवासी सेवेसाठी बाहेर काढल्याने, गडचिरोलीच्या विभाग यंत्र अभियंत्याला महामंडळाने अखेर चौकशी पूर्ण होईपर्यंत निलंबित केले आहे.
गडचिरोली जिल्ह्यातील अहेरी आगाराची एमएच ४० वाय ५४९४ ही बस गडचिरोली मुलचीरा मार्गे अहेरी या मार्गावर धावत असतानाचा व्हिडीओ कालपासून समाजमाध्यमावर व्हायरल झाला होता. या बसच्या वाहकाच्या बाजूकडील बसचे छत पूर्णपणे उखडलेल्या अवस्थेत हवेत उडताना दिसत होते. अशा धोकादायक स्थितीत बस चालवितानाचा व्हिडीओ समाजमाध्यमात व्हायरल झाल्याने महामंडळाच्या बिकट परिस्थिती विषयी जनसामान्यांमध्ये चर्चा सुरु झाली होती. विशेष मध्ये बसच्या अशा फाटक्या अवस्थेत, या बसमधून प्रवासी प्रवास करीत होते. सुदैवाने त्यांना कोणतीही दुखापत झालेली नाही.
या प्रकरणाची दखल महामंडळाने घेतली आहे. या नादुरुस्त बसच्या दुरुस्तीचे काम विभागीय कार्यशाळेत विहीत वेळेत न केल्याने, संबधीत विभागाचे यंत्र अभियंत्याला महामंडळाने निलंबित केले आहे. जनमानसात एसटी महामंडळाची प्रतिमा मलिन करण्यास त्यांना जबाबदार धरुन, पुढील चौकशी होईपर्यंत त्यांना निलंबित केल्याचे महामंडळाने आपल्या आदेशात म्हटले आहे. वाहनाची दुरुस्ती किंवा वाहन बांधणीतील दोष दूर न करता कोणतेही प्रवासी वाहन वापरु नये असे आदेश देण्यात येऊन, प्रवाशांच्या सुरक्षेला सर्वौच्च प्राधान्य द्यावे असे निर्देश सर्व आगार व्यवस्थापकांना दिल्याचे महामंडळाने म्हटले आहे.
काल सकाळी अहेरी आगारातून सहा वाजता ही बस गडचिरोली साठी निघाली होती. परत येत असताना पाऊस सुरू होता, अचानक बसचा छत पूर्णपणे उखडला. या बस मध्ये काल दहा प्रवासी होते आणि पावसाचे पाणी आत येत असल्यामुळे प्रवाशांनी आणि चालकाने छत्री घेऊन जवळपास ५० किलोमीटर ही बस चालविली. जवळपास दोन वर्षापासून ही बस भंगार अवस्थेत असून अनेकदा तक्रार केल्यानंतरही या बसची दुरुस्ती करण्यात आली नसल्याचा आरोप चालकाने केला आहे.
न्युज अनकट प्रतिनिधी : अनिल खळदकर
