कसबा-चिंचवड मतदारसंघ पोटनिवडणूकीसाठी आज मतदान । ठळक बातम्या ।

पुणे, २६ फेब्रुवारी २०२३ : महाराष्ट्रातील कसबा आणि चिंचवड विधानसभेच्या पोटनिवडणुकीसाठी रविवारी म्हणजेच आज मतदान होत आहे. सकाळी ७ वाजल्यापासून मतदानाला सुरवात झाली आहे. २ मार्च रोजी मतमोजणी होणार आहे. भारतीय जनता पक्षाच्या आमदार मुक्ता टिळक आणि लक्ष्मण जगताप यांच्या निधनानंतर या दोन जागांवर पोटनिवडणुकीची गरज निर्माण झाली आहे. पुणे शहरातील कसबा विधानसभा मतदारसंघातील पोटनिवडणुकीत भाजपचे हेमंत रासणे आणि काँग्रेसचे रवींद्र धंगेकर यांच्यात लढत होणार आहे.

धंगेकर हे काँग्रेस, राष्ट्रवादी काँग्रेस आणि शिवसेना (उद्धव बाळासाहेब ठाकरे गट) या महाविकास आघाडीचे उमेदवार आहेत. पुण्याला लागून असलेल्या चिंचवडमध्ये भाजपच्या अश्विनी जगताप आणि राष्ट्रवादीचे नाना काटे यांच्यात लढत होणार आहे. कसबा मतदारसंघात २,७५,४२८ तर ५,६८,९५४ मतदार नोंदणीकृत आहेत. मतदान चिंचवडमध्ये केंद्राच्या १०० मीटर परिसरात दुकाने बंद राहतील. चिंचवड मतदारसंघात ५,६८,९५४ मतदार नोंदणीकृत आहेत.

शिवसेना पक्षप्रमुख आणि मुख्यमंत्री एकनाथ शिंदे, उपमुख्यमंत्री देवेंद्र फडणवीस, राष्ट्रवादी काँग्रेसचे अध्यक्ष शरद पवार, प्रदेश काँग्रेस अध्यक्ष नाना पटोले, राष्ट्रवादीचे नेते अजित पवार, शिवसेना (यूबीटी) नेते आदित्य ठाकरे आदींनी यापूर्वी दोन्ही मतदारसंघात प्रचार केला होता. महाराष्ट्रात सत्तापरिवर्तन झाल्यानंतर राजकारण तापले आहे. त्यामुळे या पोटनिवडणुकीकडे शिंदे गट आणि उद्धव गटाची मानाची लढाई म्हणूनही पाहिले जात आहे. नुकतेच उद्धव ठाकरे यांच्याकडून शिवसेनेचे नाव आणि खूण हिसकाविण्यात आली आहे. शिवसेनेच्या नाव, चिन्हाबाबत उद्धव ठाकरे गट सुप्रीम कोर्टातही गेला होता; पण तिथेही उद्धव गटाला झटका बसला.

२०१४ पासून झालेल्या विकासकामांच्या जोरावर केंद्रात आणि महाराष्ट्रात भारतीय जनता पक्ष (भाजप) आणि राष्ट्रीय लोकशाही आघाडी (एनडीए) पुन्हा सत्तेवर येईल, असा विश्वास केंद्रीय रस्ते वाहतूक आणि महामार्ग मंत्री नितीन गडकरी यांनी शनिवारी व्यक्त केला.

‘न्यूज अनकट’ प्रतिनिधी : सूरज गायकवाड