Wet Dates Benefits: पावसाळ्याच्या सरी बरसू लागल्या असतानाच, पिंपरीच्या बाजारात सध्या रसरशीत ओल्या खजुरांची (Wet Dates) प्रचंड आवक झाली आहे. विविध ताज्या फळांच्या गर्दीत ओल्या खजुरांना ग्राहकांकडून विशेष पसंती मिळत असून, सध्या त्यांचे भावही स्थिर आणि परवडणारे असल्याने खजूरप्रेमींमध्ये आनंदाचे वातावरण आहे.
पोषणमूल्यांचा खजिना आरोग्यासाठी वरदान;
केवळ गोड चवीपुरते मर्यादित नसून, ओले खजूर हे खऱ्या अर्थाने ‘व्हिटॅमिनची कॅप्सूल’ ठरले आहेत. नैसर्गिक साखरेसोबतच या खजुरांमध्ये फायबर, पोटॅशियम, मॅग्नेशियम, लोह, कॅल्शियम आणि व्हिटॅमिन बी६ यांसारखी आवश्यक पोषणतत्त्वे मुबलक प्रमाणात आढळतात. त्यामुळे लहान मुलांपासून ते वयस्कर व्यक्तींपर्यंत सर्वांसाठीच हे फळ ऊर्जा देणारे आणि शरीरासाठी अत्यंत फायदेशीर आहे. आहार तज्ज्ञ डॉ. तनप्रीत कौर-मेहता यांच्या मते, “ओले खजूर हे नैसर्गिक ऊर्जेचा उत्तम स्रोत आहेत. यात फायबर असल्याने पचनक्रिया सुधारते.”
असंख्य आरोग्यदायी फायदे
ओल्या खजुरांचे नियमित सेवन अनेक आरोग्य समस्यांवर गुणकारी ठरते. हे मेंदूचे कार्य सुधारते, स्मरणशक्ती वाढवते, थकवा कमी करून त्वरित ऊर्जा प्रदान करते. तसेच, हाडे मजबूत करण्यास मदत करते आणि ऑस्टिओपोरोसिस सारख्या समस्यांपासून संरक्षण देते.
सेवन करताना घ्या काळजी;
आरोग्यदायी असले तरी, मधुमेह असलेल्या व्यक्तींनी किंवा वजन कमी करू इच्छिणाऱ्यांनी डॉक्टरांच्या सल्ल्यानुसार आणि प्रमाणात खजूर खावा. अतिरिक्त सेवनामुळे आरोग्याला धोका निर्माण होऊ शकतो. तसेच, खजूर खरेदी करताना त्याची ताजगी आणि गुणवत्ता पाहूनच खरेदी करणे महत्त्वाचे आहे. भेसळयुक्त खजुरांचे सेवन आरोग्यासाठी हानिकारक ठरू शकते.
अनेकविध उपयोग;
ओल्या खजुरांचा आहारात विविध प्रकारे समावेश करता येतो. दूध आणि मधासोबत शेक, गुळाऐवजी खजुराचा वापर करून लाडू, तसेच खीर आणि पुडिंगमध्ये नैसर्गिक गोडवा आणण्यासाठी याचा उपयोग होतो. बारीक चिरून सॅलडमध्येही खजूर एक वेगळी चव देतात.
सध्याचे दर (प्रती किलो)
- लाल खजूर: ₹८० – ₹१००
- पिवळा खजूर: ₹१०० – ₹१२०
(जाती आणि ताजगीनुसार किमतीत थोडा फरक असू शकतो.)
थोडक्यात, ओला खजूर हे चवीला गोड आणि आरोग्याला लाभदायक असे दुहेरी वरदान आहे, जे या पावसाळ्यात आपल्या आहारात नक्कीच सामील करून घ्यावे!
न्यूज अनकट प्रतिनिधी; सोनाली तांबे
