नवी दिल्ली, 13 सप्टेंबर 2021: भारताला या महिन्यात स्विस बँक अकाउंट ची तिसरी डिटेल लिस्ट मिळणार आहे. ऑटोमॅटिक एक्सचेंज ऑफ इन्फॉर्मेशन कराराअंतर्गत स्वित्झर्लंड स्विस बँकांच्या भारतीय खातेधारकांची माहिती भारत सरकारला देईल. त्यात पहिल्यांदाच भारतीयांच्या मालकीच्या अचल संपत्तीचा डेटा देखील समाविष्ट असेल.
काळ्या पैशाविरोधात भारत सरकारच्या लढाईतील हा मैलाचा दगड आहे, असे अधिकाऱ्यांनी रविवारी सांगितले. स्वित्झर्लंडमधील भारतीयांच्या फ्लॅट आणि अपार्टमेंटची संपूर्ण माहिती भारताला या महिन्यात मिळेल. तसेच, अशा संपत्तीतून होणाऱ्या कमाईवरील कर दायित्व जाणून घेण्यास मदत होईल.
प्रतिमा सुधारण्यासाठी उचलली स्विस बँकेने पावले
स्वित्झर्लंडचे हे पाऊल त्याची प्रतिमा सुधारण्याच्या दृष्टीनेही महत्त्वाचे आहे. स्विस बँका काळ्या पैशासाठी सुरक्षित आश्रयस्थान म्हणून ओळखल्या जातात. हा देश या प्रतिमेपासून मुक्त होण्यासाठी आणि स्वतःला एक विशेष जागतिक आर्थिक केंद्र म्हणून पुन्हा स्थापित करण्यासाठी कठोर परिश्रम घेत आहे. भारत सरकारला स्विस बँकेकडून तिसऱ्यांदा खात्यांविषयी माहिती दिली जाईल.
बँकेचा निर्णय योग्य, तज्ञांचे मत
स्वित्झर्लंड सरकारने ही माहिती भारताला देण्यास सहमती दर्शवली आहे. या क्षेत्राशी संबंधित तज्ञ आणि स्वित्झर्लंडमध्ये गुंतवणूक आकर्षित करणाऱ्या व्यावसायिकांनी या हालचालीचे समर्थन केले आहे. ते म्हणाले की, जगभरातील लोकांना असे वाटते की स्विस मालमत्तांमध्ये बेकायदेशीर पैसा गुंतवला गेला आहे. स्विस सरकारचे हे पाऊल गैरसमज दूर करेल.
न्यूज अनकट प्रतिनिधी: ईश्वर वाघमारे
