मुंबई, २२ ऑगस्ट २०२३ : ब्राह्मण समाजात शिवाजी व संभाजी नावे ठेवत नाहीत, असे विधान छगन भुजबळ यांनी दोन दिवसांपूर्वी संभाजी भिडे यांच्या वादग्रस्त विधानांवर भाष्य करताना केले होते. त्यांच्या या विधानाचे महाराष्ट्रात तीव्र पडसाद उमटले आहे. त्यातच परशुराम सेवा संघाचे अध्यक्ष विश्वजित देशपांडे यांनी या प्रकरणी भुजबळांच्या कानशिलात मारणाऱ्यांना १ लाख रुपयांचे बक्षीस देण्याची घोषणा केली होती. या पार्श्वभूमीवर छगन भुजबळ यांनी आपली भूमिका स्पष्ट केली आहे. घाणेरड्या शब्दांत शिवीगाळ करणाऱ्यांना ब्राह्मण कोण म्हणणार? मी धमक्यांना भीक घालत नाही, अशा स्पष्ट शब्दांत राष्ट्रवादी काँग्रेसचे अजित पवार गट नेते छगन भुजबळ यांनी मंगळवारी आपल्यावर होणारी टीका फेटाळून लावली आहे.
छगन भुजबळ वृत्तवाहिनी संवाद साधताना म्हणाले की, संभाजी भिडे मुळात मनोहर कुलकर्णी आहेत हे खरे आहे की नाही ते अगोदर सांगा. ते वाटेल ते बडबड करतात. ते मनोहर कुलकर्णी असतील, तर ते संभाजी नाव घेऊन महात्मा फुले, सावित्रीबाई फुले, बाबासाहेब आंबेडकर, महात्मा गांधी यांच्याविषयी गलिच्छ विधाने का करत आहेत? त्यांनी खास ही शिवीगाळ करण्यासाठी संभाजी नाव घेतले आहे का? त्यांचे खरे नाव काय? सहसा अशी नावे या समाजात नसतात. माझे केवळ एवढेच म्हणणे होते. असं छगन भुजबळ म्हणाले. तसेच पुढे बोलताना म्हणाले की, सरस्वतीच्या बाबतीत मी म्हणालो होतो की, महात्मा फुले, सावित्रीबाई फुले, बाबासाहेब आंबेडकर, छत्रपती शिवाजी महाराज आमचे हे देव आहेत. शाळेत, शिक्षणात यांचे कर्तृत्व आपण पुढे आणले पाहिजे. घरात कुणी कुणाचाही पूजा करा. माझी काही हरकत नाही. पण माझे मत मांडण्याचा मला पूर्ण अधिकार आहे
व्हॉट्स अप मेसेज करुन धमक्या देण्यात येत आहेत. त्यावर छगन भुजबळ म्हणाले की, मी ब्राह्मण आहे म्हणतात आणि अतिशय घाणेरड्या भाषेत शिव्या देतात, यांना ब्राह्मण कोण म्हणणार? जे घाणेरड्या शिव्या देतात त्यांना ब्राह्मण म्हणायच का आम्ही. ज्यांनी मला शिव्या दिल्या, त्यांच्याबद्दल बोलतोय मी अस छगन भुजबळ म्हणाले. मी चुकलो असेन, तर पोलिसांनी माझ्याविरुद्ध कारवाई करावी. कोणी चुकत असेल, कायदा हातात घेत असेल, तर त्याच्याविरुद्ध पोलीस कारवाई करतील असं छगन भुजबळ म्हणाले आहेत.
न्यूज अनकट प्रतिनिधी : वैभव शिरकुंडे
