5G साठी नवीन सिम कार्ड घ्यावं लागणार का? कोणत्या फोनवर मिळणार सेवा? जाणून घ्या ५ महत्त्वाच्या प्रश्नांची उत्तरं

पुणे, २ ऑक्टोंबर २०२२: भारतात 5G सेवा सुरू झाली असून यासोबतच तंत्रज्ञानाचं नवं युग सुरू झालंय. आता भारत देखील 5G ​​नेटवर्क उपलब्ध असलेल्या देशांच्या यादीत सामील झालाय. पंतप्रधान नरेंद्र मोदी यांनी भारतीय मोबाइल काँग्रेसमध्ये 5G सेवा सुरू केली आहे. यावेळी त्यांनी Jio, Airtel आणि Vi च्या 5G सेवेचा डेमो देखील पाहिला.

तुमच्याही मनात 5G शी संबंधित अनेक प्रश्न येत असतील. उदाहरणार्थ, यासाठी तुम्हाला काय करावं लागंल आणि 4G बद्दल काय. आम्ही अशाच काही प्रश्नांची यादी तयार केली आहे, ज्यामध्ये तुम्हाला 5G शी संबंधित अनेक माहिती एकाच ठिकाणी देण्याचा प्रयत्न करण्यात आलाय. 5G सिग्नलसाठी तुम्हाला काय करावं लागंल ते जाणून घेऊया.

कोणत्या फोनमध्ये 5G सेवा असेल?

सर्वात आधी कोणाच्याही मनात प्रश्न येईल की त्याच्या फोनमध्ये 5G सेवा चालंल की नाही. याचं उत्तर तुमच्या सध्याच्या फोनवर अवलंबून आहे. जर तुम्ही 4G स्मार्टफोन वापरत असाल तर तुम्ही त्यावर 5G सेवा वापरू शकणार नाही. तुमचा सध्याचा फोन 5G आहे, तर तुम्हाला सेवा मिळंल.

सध्या, लोकांकडं उपलब्ध असलेले बहुतेक 5G फोन हे स्पेक्ट्रम लिलाव होण्याच्या आधीचे आहेत. अशा परिस्थितीत अनेक यूजर्स त्यांच्या फोनमध्ये 5G सिग्नलचा पर्याय येत नसल्याची तक्रार करत आहेत. यासाठी तुम्हाला तुमचा फोन अत्याधुनिक सॉफ्टवेअरमध्ये अपडेट करावा लागेल. त्याच वेळी, तुम्ही स्मार्टफोन ब्रँडच्या वेबसाइटला भेट देऊन तुमच्या फोनमध्ये 5G सपोर्ट आहे की नाही हे देखील तपासू शकता.

मला 5G सिम कार्ड विकत घ्यावं लागंल का?

तूर्तास, तसं नाही. अलीकडंच एअरटेलच्या सीईओने ग्राहकांना लिहिलेल्या पत्रात ही माहिती देण्यात आलीय. एअरटेलची सेवा सध्याच्या सिमकार्डवरच उपलब्ध असंल असं त्यांनी सांगितलं होतं. यासाठी ग्राहकांना नवीन सिमकार्डची गरज भासणार नाही.

मात्र, 5G सेवा मिळवण्यासाठी 5G फोन देखील आवश्यक आहे. दुसरीकडे, इतर ब्रँडबद्दल बोलायचं झाल्यास, Jio आणि Vi युजर्स देखील जुन्या सिम कार्डवर 5G सेवा वापरण्यास सक्षम असतील. कदाचित नंतर टेलिकॉम कंपन्या हळूहळू सिम कार्ड अपडेट करतील.

कोणत्या शहरांना मिळणार 5G सेवा?

एअरटेलची 5G सेवा ८ शहरांमध्ये लाइव्ह झालीय. कंपनीने आजपासूनच 5G सेवा देण्यास सुरुवात केलीय. तुम्ही दिल्ली, मुंबई, कोलकाता, बंगळुरू, चेन्नई, वाराणसी, सिलीगुडी आणि हैदराबादमध्ये राहत असाल तर तुम्ही निवडक ठिकाणी 5G सेवा वापरून पाहू शकता.

एअरटेलने म्हटलंय की मार्च २०२४ पर्यंत त्यांची 5G सेवा देशभरात पोहोचंल. तथापि, जिओबद्दल बोलताना, कंपनी दिल्ली, मुंबई, कोलकाता आणि चेन्नई या चार शहरांमध्ये दिवाळीपर्यंत आपली सेवा लाइव्ह करेल. त्याच वेळी, पॅन इंडिया स्तरावर, कंपनी पुढील वर्षाच्या अखेरीस आपल्या सेवेत पोहोचेल.

Vi ने अद्याप 5G सेवा सुरू करण्याची कोणतीही तारीख जाहीर केलेली नाही. ग्राहकांच्या गरजेनुसार ही सेवा सुरू करणार असल्याचं कंपनीचं म्हणणं आहे. सुरुवातीला, कंपन्यांनी देशातील १३ शहरांमध्ये 5G सेवा देण्याची योजना आखलीय.

रिचार्ज प्लॅनची ​​किंमत किती असंल?

अद्याप कोणत्याही टेलिकॉम कंपनीने आपल्या रिचार्ज प्लॅनचा खुलासा केलेला नाही. तसंच योजना कधी सुरू होतील हे देखील सांगितलेलं नाही. प्लॅनपूर्वी टेलिकॉम कंपन्या त्यांची सेवा लाईव्ह करतील. IMC २०२२ मध्ये, मुकेश अंबानींनी निश्चितपणे सांगितले आहे की इतर देशांच्या तुलनेत भारतात 5G सेवा परवडणारी असंल.

न्यूज अनकट प्रतिनिधी: ईश्वर वाघमारे