३१ डिसेंबरला साईबाबांचे मंदिर रात्रभर खुले राहणार

शिर्डी: श्री साईबाबा संस्‍थानच्या वतीने नाताळ सुट्टी, चालू वर्षाला निरोप व नवीन वर्षाचे स्‍वागतानिमित्‍त शिर्डी महोत्‍सवाचे आयोजन करण्‍यात आले आहे. दरवर्षी नाताळ सुट्टी, चालू वर्षाला निरोप व नवीन वर्षाचे स्‍वागतानिमित्‍त साईबाबांच्या दर्शनासाठी शिर्डीत मोठ्या प्रमाणात भाविक येत असतात. यासर्व भाविकांना साईंच्‍या समाधीच्‍या दर्शनाचा लाभ मिळावा, व होणाऱ्या गर्दीचे नियोजन योग्‍य रितीने व्‍हावे, या उद्देशाने मंगळवारी (३१ डिसेंबर) साई मंदिर दर्शनासाठी रात्रभर खुले ठेवण्यात येणार आहे. साईबाबा संस्थानचे मुख्य कार्यकारी अधिकारी दीपक मुगळीकर यांनी ही माहिती दिली.

मंदिर रात्रभर खुले ठेवले जाणार असल्यामुळे ३१ डिसेंबरची शेजारती व १ जानेवारीची पहाटेची काकड आरती होणार नाही. याशिवाय नाताळ व नवर्षाच्‍या सुट्टीच्‍या गर्दीमुळे २५ डिसेंबर, ३१ डिसेंबर व १ जानेवारी, असे तीन दिवस श्री साईसत्‍यव्रत पूजा, अभिषेक पूजा बंद राहणार आहे. तसेच ३१ डिसेंबर व १ जानेवारी असे दोन दिवस वाहन पूजा बंद राहतील, याची साईभक्‍तांनी नोंद घ्‍यावी.