पुण्यातील डीआयएटी ने बनवला नॅनो टेक्नॉलॉजी वरील निर्जंतुकीकरण फवारा

पुणे, दि. ८ जून २०२०: संरक्षणविषयक प्रगत तंत्रज्ञानावर संशोधन करणारी पुण्यातील अभिमत विद्यापीठाच्या दर्जाची संस्था, डीआयएटी ने कोविड-१९ चा संसर्गा पासून वाचण्यासाठी नॅनो टेक्नॉलॉजी वर म्हणजेच अतिसूक्ष्म तंत्रज्ञानावर आधारित फवारणी यंत्रणा बनवली आहे. नॅनो टेक्नॉलॉजी वर आधारित या तंत्रज्ञानाच्या सहाय्याने सर्व प्रकारच्या पृष्ठभागांवर फवारणी करता येऊ शकते व त्या जागेचे निर्जंतुकीकरण करता येऊ शकते. या फवाऱ्याला “अनन्या” असे नाव देण्यात आले आहे. विकसित केलेले हे फवारणी तंत्रज्ञान कोणालाही वापरता येण्यासारखे बनवले आहे. हे फवारणी तंत्रज्ञान सामान्य माणूस देखील वापरू शकतो तसेच वैद्यकीय कर्मचारी देखील हे तंत्रज्ञान सहज रित्या हाताळू शकतात. महत्वाचे म्हणजे हा फवारा कोणत्याही ठिकाणी वापरता येऊ शकतो. सार्वजनिक ठिकाणी देखील याचा वापर करता येऊ शकतो.

मास्क,पीपीई किट्स, रुग्णालयातील वापराचे कपडे तसेच इतर कुठल्याही साधने किंवा उपकरणांवर, जिथून संसर्ग होण्याची शक्यता आहे,अशी वैद्यकीय उपकरणे, लिफ्टची बटणे, डोअरबेल, मार्गिका,
खोल्या अशा कोणत्याही ठिकाणी या स्प्रेने फवारणी करता येईल.

या नॅनो तंत्रज्ञानामुळे कोरोना विषाणूचा मानवी शरीरात होणारा शिरकाव रोखण्यास मदत तर मिळेलच,त्याशिवाय, मास्क, पीपीई च्या संरक्षक साधनांवर असलेले विषाणू देखील निष्प्रभ करण्यात त्याची मदत होईल.

हा पाणी-आधारित फवारा असून २४ तासांपेक्षाही जास्त काळ त्याचा प्रभाव कायम असतो. फवाऱ्यातील रसायने, कापड, प्लास्टिक आणि धातू अशा सर्व पृष्ठभागांवर सारखीच प्रभावी ठरतात. तसेच याच्या विषारी द्रव्यांचा मानवावर काहीही परिणाम होत नाही. हा फवारा सहा महिन्यांपेक्षा अधिक काळ टिकू शकतो. या फवाऱ्याचे व्यावसायिक दृष्टीने उत्पादन करण्याची प्रक्रिया सुरु आहे. हा फवारा अगदी छोट्या आकारापासून ते मोठ्या आकारापर्यंत उपलब्ध असेल.

न्यूज अनकट प्रतिनिधी