हवेलीतील गावांमध्ये ‛पावसाची’ दीड तास बॅटिंग

वाघोली, दि. २९ जून २०२०: जवळपास एक महिना दडी मारल्यानंतर आज सायंकाळी पूर्व हवेलीतील गावामध्ये पावसाने तुफान बॅटींग केली त्यामुळे वातावरणात कमालीचा गारवा निर्माण झाला होता. उकाड्याने बेहाल झालेल्या नागरिकांना या पावसाने आल्हाददायक वातावरण निर्माण केले.

निसर्ग वादळाच्या दरम्यान पुणे व परिसरात मोठ्या प्रमाणावर पाऊस पडला परंतु त्यानंतर या भागात चांगला पाऊस पडलाच नाही. गेल्या काही दिवसांपासून वातावरणात कमालीची उष्णता वाढली परिणामी अंगातून घामाच्या धारा वाहत होत्या. प्रत्येक जण पावसाची चातकाप्रमाणे वाट पाहत होता. आज सोमवारी दुपारी साडेतीन वाजण्याच्या सुमारास आकाशात काळेभोर ढग जमा होऊन हवेत बाष्पाचे प्रमाण वाढले होते. त्यानंतर चार वाजण्याच्या सुमारास जोरदार विजांच्या कडकडाट व ढगांच्या गडगडासह मुसळधार पाऊस पडला.

या पावसाने जागोजागी पाणी साचले आहे. या पावसामुळे सर्वसामान्य तर आनंदी झाला परंतु याचा शेतकरी वर्गास मोठा फायदा झाला आहे. पूर्व भागातील बहुतेक सर्वच गावामध्ये पाऊस पडला आहे.

न्यूज अनकट प्रतिनिधी – ज्ञानेश्वर शिंदे