नवी दिल्ली, १० मे २०२१: संपूर्ण भारत कोरोनाच्या प्रादुर्भावामुळं त्रस्त आहे. मृत्यूची संख्या सातत्यानं वाढत आहे. त्यादरम्यान, ब्रिटनमधून एक धक्कादायक बातमी समोर आलीय, ज्यामध्ये असं सांगितलं गेलं आहे की ऑगस्टपर्यंत भारतात कोरोनामुळे एकूण १० लाख मृत्यू येऊ शकतात. अहवालात या मृत्यूंसाठी केंद्र सरकारला जबाबदार धरण्यात आलंय.
खरं तर, ब्रिटीश मेडिकल जर्नल ‘द लान्सेट’मध्ये शुक्रवारी प्रसिद्ध झालेल्या संपादकीयमध्ये असं म्हटलं गेलं आहे की १ ऑगस्ट २०२१ पर्यंत भारत दहा लाख कोरोना मृत्यूचा सामना करू शकतो. असं म्हटलं गेलंय की जर हे निकाल वास्तवात आले तर ही जबाबदारी भारत सरकारची असेल. या अहवालानुसार पुढील तीन महिन्यांत साडेसात लाख मृत्यूचा धोका आहे.
लॅन्सेट एडिटोरियलमध्ये ‘इन्स्टिट्यूट फॉर हेल्थ मेट्रिक्स अँड इव्हॅल्युएशन’ च्या हवाल्यानं असं लिहिलंय. ही एक स्वतंत्र जागतिक आरोग्य संशोधन संस्था आहे. संपादकीयमध्ये म्हटलं आहे की कोरोनावर नियंत्रण ठेवण्यासाठी भारतानं निष्काळजीपणा दाखवला आहे, त्याचा परिणाम समोर दिसत आहे.
मेडिकल जर्नलच्या संपादकीय पत्रिकांनी भारतात सतत वाढत असलेल्या कोरोना संसर्गासाठी केंद्र सरकारला जबाबदार धरलं आहे. असं म्हटलं जात आहे की, सुपरस्प्रेडर इवेंटचा इशारा देऊनही सरकारनं धार्मिक सणांना परवानगी दिली, ज्यात देशभरातून लाखो लोक आले. राजकीय मेळावे घेण्यात आले, ज्यामध्ये कोरोना प्रोटोकॉलची दखल घेतली गेली नव्हती.
या व्यतिरिक्त, लसीकरण मोहिम कमी करणं हे देखील व्हायरसच्या संसर्गाचं सर्वात मोठं कारण आहे. संपादकीयात असंही लिहिलं होतं की कोरोना संकटाच्या वेळी सरकारवरील टीका आणि चर्चा थांबविण्याच्या सरकारच्या कृतीस कोणतेही निमित्त दिले जाऊ शकत नाही.
कोरोनाच्या दुसर्‍या लाटेबाबत लवकरात लवकर इशारे देण्यात आल्याचंही सांगण्यात आलं, त्याकडं दुर्लक्ष केलं गेलं. मार्चच्या सुरूवातीला कोरोनाची दुसरी लाट येण्यापूर्वी भारताच्या आरोग्यमंत्र्यांनी कोरोनाला एंडगेम घोषित केले. तथापि, हे घडलं नाही आणि कोरोना विषाणूमुळं मोठ्या प्रमाणात मृत्यूचा आकडा समोर आला.
लॅन्सेट भारतात कोरोना नियंत्रित करण्यासाठी सल्ला देखील प्रदान करते. प्रथम लसीकरण मोहीम बदलून ती तार्किक करुन वेगानं राबविण्यात यावी, असं सांगण्यात आलंय. यासाठी लसीचा पुरवठा वाढविण्यात यावा आणि वितरण मोहीम राबविण्यात यावी, ज्यामध्ये शहरी व ग्रामीण भाग व्यापतील.
दुसरा सल्ला देण्यात आला की जर लॉकडाउनची शक्यता असेल तर ते नाकारू नये. योग्य आकडेवारी लोकांसमोर प्रकाशित करावी लागेल. जेणेकरून देशात खरोखर काय घडलं आहे हे जनतेला सांगितलं जाऊ शकेल.
न्यूज अनकट प्रतिनिधी: ईश्वर वाघमारे
