सोनिया गांधींच्या आईचे इटलीत निधन, पंतप्रधान मोदींनी व्यक्त केला शोक

नवी दिल्ली, १ सप्टेंबर २०२२: काँग्रेसच्या हंगामी अध्यक्षा सोनिया गांधी यांना मातृशोक सहन करावा लागला आहे. त्यांची आई श्रीमती पाओला माइनो यांचे शनिवारी २७ ऑगस्ट रोजी इटलीमध्ये निधन झाले. त्यांच्या पार्थिवावर मंगळवारी संपूर्ण कायदेशीर नियमांसह अंत्यसंस्कार करण्यात आले. काँग्रेसचे मीडिया प्रभारी जयराम रमेश यांनी ट्विट करून याबाबत माहिती दिली आहे.

सोनिया गांधी आरोग्य तपासणीसाठी गेल्या आठवड्यात परदेश दौऱ्यावर गेल्या होत्या. सध्या त्या परदेशात आहे. राहुल गांधी आणि प्रियांका गांधीही त्यांच्यासोबत आहेत. गेल्या काही वर्षांत राहुल आणि प्रियंका गांधी यांनी अनेकवेळा परदेश दौरे केले आहेत. परदेश दौऱ्यांवरून राहुल गांधींना विरोधी पक्षांकडूनही अनेकदा टीकेला सामोरे जावे लागले आहे. त्यावर पक्षाला स्पष्टीकरण द्यावे लागले की ते आजारी नातेवाईकाला भेटण्यासाठी विदेश दौऱ्यावर गेले होते.

सोनिया गांधी यांच्या आईचे वय सुमारे ९० वर्षे आहे. २३ ऑगस्ट रोजी सोनिया गांधी आपल्या आईला भेटण्यासाठी इटलीला रवाना झाल्या होत्या.

सोनिया गांधी यांच्या आईच्या निधनाबद्दल पंतप्रधान नरेंद्र मोदी यांनीही शोकसंदेश दिला आहे. त्यांनी ट्विट करून म्हटले की, सोनिया गांधी यांच्या आई पाओला माइनो यांच्या निधनाबद्दल मी शोक व्यक्त करतो, त्यांच्या आत्म्याला शांती लाभो. या दु:खाच्या वेळी त्यांच्या संपूर्ण कुटुंबाप्रती माझ्या संवेदना आहेत.

काँग्रेस पक्षात अध्यक्षपदाच्या निवडणुकीची प्रक्रिया सुरू असताना सोनिया गांधींच्या आरोग्य तपासणीसाठी हा परदेश दौरा होत आहे. राहुल गांधी यांनी पक्षाच्या अध्यक्षपदाची आपली इच्छा नसल्याचे स्पष्ट केले आहे. २०१९ मध्ये जेव्हा त्यांनी या पदाचा राजीनामा दिला तेव्हा ते म्हणाले होते की, यावेळी नेहरू-गांधी घराण्यातील एकही सदस्य अध्यक्षपदावर बसणार नाही. राजीनामा दिल्यानंतर सोनिया गांधी पक्षाच्या हंगामी अध्यक्षपदाची जबाबदारी सांभाळत आहेत.

न्यूज अनकट प्रतिनिधी: ईश्वर वाघमारे