तामिळनाडू, 12 नोव्हेंबर 2021: तामिळनाडूमध्ये गेल्या आठवडाभरापासून पाऊस पडत आहे. पूरसदृश परिस्थितीमुळे नागरिकांचे हाल होत आहेत. दरम्यान, तामिळनाडू पोलिसांच्या एका महिला निरीक्षकाचा व्हिडिओ सोशल मीडियावर मोठ्या प्रमाणात व्हायरल होत आहे. महिला इन्स्पेक्टर त्या बेशुद्ध तरुणाला खांद्यावर उचलून हॉस्पिटलमध्ये घेऊन जात आहेत.
हा व्हिडिओ IAS सुप्रिया साहू यांनी ट्विटरवर शेअर केला आहे. इन्स्पेक्टर राजेश्वरी यांच्यापेक्षा मजबूत खांदा कोणाचाही असू शकत नाही, असे ट्विट त्यांनी केले आहे. मुसळधार पावसात त्यांनी एका बेशुद्ध व्यक्तीला ऑटोमधून हॉस्पिटलमध्ये नेले.
राजेश्वरीने त्यांच्या खांद्यावर घेतलेल्या व्यक्तीचे नाव उधया असे आहे. राजेश्वरीच्या म्हणण्यानुसार, जेव्हा त्या चेन्नईची परिस्थिती जाणून घेण्यासाठी बाहेर गेल्या होत्या तेव्हा त्यांना रस्त्याच्या कडेला एक व्यक्ती बेशुद्ध पडलेला दिसला. लोकांच्या मदतीने त्यांनी त्याला उचलले आणि तातडीने रुग्णालयात नेले. वेळीच रुग्णालयात पोहोचल्याने उदया यांचे प्राण वाचले. सध्या त्यांच्यावर रुग्णालयात उपचार सुरू आहेत. राजेश्वरी चेन्नईतील टीपी चेतराम पोलिस स्टेशनमध्ये तैनात आहे.
तामिळनाडूतील 20 जिल्ह्यांमध्ये रेड अलर्ट
तामिळनाडूमध्ये मुसळधार पावसामुळे हवामान खात्याने 20 जिल्ह्यांमध्ये रेड अलर्ट जारी केला आहे. या जिल्ह्यांमध्ये चेन्नई, तिरुवल्लूर, रानीपेट, वेल्लोर, सालेम, कल्लाकुरिची, तिरुपत्तूर आणि तिरुवन्नमलाई यांचा समावेश आहे. यापैकी एक किंवा दोन भागात 20.4 सेंटीमीटरपेक्षा जास्त पाऊस पडू शकतो, तर इतर भागातही जोरदार पाऊस पडण्याची शक्यता आहे. तामिळनाडूशिवाय आंध्र प्रदेश आणि पुद्दुचेरीमध्ये मुसळधार ते अतिवृष्टीचा इशारा देण्यात आला आहे.
न्यूज अनकट प्रतिनिधी: ईश्वर वाघमारे
