मुंबई, ६ मार्च २०२३ : सुप्रसिद्ध चित्रपट अभिनेते बीग बी अमिताभ बच्चन हैदराबाद येथे शूटिंगदरम्यान जखमी झाले. नुकतीच त्यांनी स्वत:च आपल्या ब्लॉगवर याची माहिती दिली आहे. ते सध्या मुंबईतील आपल्या घरी आराम करीत आहेत. अमिताभ बच्चन हे ‘प्रभास’च्या ‘प्रोजेक्ट के’ या चित्रपटाचे शूटिंग करीत होते. त्यात एक ॲक्शन सीन करताना त्यांच्या बरगड्यांना दुखापत झाली. हैदराबाद येथे उपचार घेतल्यानंतर त्यांना मुंबईला पाठविण्यात आले आहे. आता आपली तब्ब्येत ठीक आहे.
त्यामुळे काळजी करू नका, असे आवाहन स्वतः अमिताभ बच्चन यांनी आपल्या चाहत्यांना केलं.
अमिताभ बच्चन आपल्या ब्लॉगमध्ये म्हणाले की, बरगडीच्या पिंजऱ्यातील स्रायू फाटले आहेत. शूटिंग रद्द करण्यात आली आहे. पट्टी बांधली असून, उपचार सुरू आहेत. खूप जास्त वेदना होत आहेत. हलण्यासही त्रास होत आहे. श्वास घेण्यासही त्रास होत आहे. या वेदना कमी करण्यासाठी मला काही औषधी देण्यात आली. यातून सावरण्यासाठी आणखी काही आठवडे लागतील.
‘जलसा’वर चाहत्यांना भेटू शकणार नाही : अमिताभ
बीग बी अमिताभ बच्चन म्हणाले की, ‘मी बरा होईपर्यंत सर्व कामे थांबविण्यात आली आहेत. मी ‘जलसा’त विश्रांती घेत आहे. फक्त आवश्यक गोष्टींसाठी थोडेसे चालावे लागणार आहे. होय, आराम तर सुरूच राहणार. मी ‘जलसा’च्या गेटवर माझ्या चाहत्यांना भेटू शकणार नाही, हे सांगणे माझ्यासाठी खूप कठीण आहे. ‘जलसा’वर येण्याचा विचार करणाऱ्यांना सध्या त्यांना याची माहिती द्या. बाकी सर्वकाही ठीक आहे.’
‘न्यूज अनकट’ प्रतिनिधी : सतीश पाटील
