ऑस्ट्रेलियाचे पंतप्रधान स्कॉट मॉरिसन निवडणुकीत पराभूत, लेबर पार्टीचे अँथनी अल्बानीज नवीन पंतप्रधान

कॅनबेरा, 22 मे 2022: ऑस्ट्रेलियाचे पंतप्रधान स्कॉट मॉरिसन यांचा निवडणुकीत पराभव झाला आहे. निवडणुकीत विजयी झालेले लेबर पार्टीचे अँथनी अल्बानीज हे आता ऑस्ट्रेलियाचे नवे पंतप्रधान असतील. निवडणुकीचे निकाल आल्यानंतर मॉरिसन यांनी लिबरल पक्षाच्या नेत्याचा राजीनामा देणार असल्याचे सांगितले. पक्षाच्या पराभवाची जबाबदारी आपण घेतो, असे ते म्हणाले.

ते म्हणाले की, एक नेता म्हणून मी पराभवाची जबाबदारी घेतो. ही जबाबदारी नेतृत्वाची आहे. पक्षाच्या पुढील बैठकीत मी राजीनामा सादर करणार असल्याचे त्यांनी सांगितले. मला लिबरल पक्षाचे नेतृत्व करण्याची संधी मिळाली, देशातील जनतेचा पाठिंबा मिळाला, त्याबद्दल सर्वांचे आभार, असे ते म्हणाले.

ऑस्ट्रेलियात लोअर चेंबरमध्ये 151 जागांसाठी मतदान झाले. सरकार स्थापन करण्यासाठी 76 जागांची गरज आहे. ऑस्ट्रेलियात दोन सभागृह आहेत. वरच्या सभागृहाचा कार्यकाळ 6 वर्षांचा असतो. येथील सरकारचा कार्यकाळ तीन वर्षांचा आहे. म्हणजेच दर तीन वर्षांनी निवडणुका होतात.

मॉरिसन आणि अल्बानीज यांच्यात झाला मुख्य सामना

ऑस्ट्रेलियाच्या पंतप्रधानपदाच्या निवडणुकीत सहा उमेदवार पंतप्रधानपदाच्या शर्यतीत होते, पण मुख्य लढत मॉरिसन आणि अल्बानीज यांच्यात होती. 2019 च्या निवडणुकीत मॉरिसन यांना पूर्ण बहुमतही मिळवता आले नाही आणि त्यांनी छोट्या पक्षांसह सरकार स्थापन केले. यावेळी झालेल्या निवडणुकीत हवामान बदल हा मोठा मुद्दा होता. मॉरिसन सरकारला जंगलातील आग आणि पुराने वेढले होते.

ऑस्ट्रेलियाचे निवडून आलेले पंतप्रधान अँथनी अल्बानीज आता क्वाड समिटसाठी टोकियोला जाणार आहेत. येथे ते भारताचे पंतप्रधान नरेंद्र मोदी यांच्याशी द्विपक्षीय चर्चा करतील. ऑस्ट्रेलियाचे भारतातील उच्चायुक्त बॅरी ओ’फेरेल एओ यांनी ट्विट केले की, ऑस्ट्रेलियाचे निवडून आलेले पंतप्रधान अँथनी अल्बानीज यांनी 1991 आणि 2018 मध्ये भारताला भेट दिली होती. त्यांनी 2018 मध्ये भारतात संसदीय शिष्टमंडळाचे नेतृत्व केले होते. यादरम्यान त्यांनी आर्थिक, धोरणात्मक संबंध अधिक दृढ करण्यासाठी वचनबद्ध केले होते.

न्यूज अनकट प्रतिनिधी: ईश्वर वाघमारे