काम आटोपून घराकडे निघालेल्या पिता-पुत्रांवर मधमाश्यांचा हल्ला; पित्याचा मृत्यू तर पुत्र गंभीर जखमी

जळगाव, १ एप्रिल २०२३: रोजंदारीचे काम करुन घराकडे निघालेल्या पिता-पूत्रांवर मधमाशांनी अचानक केलेल्या हल्ल्यानंतर ५८ वर्षीय प्रौढाचा मृत्यू ओढवला तर मुलगा गंभीर जखमी झाल्याची घटना पाचोरा तालुक्यातील नगरदेवळा गावाजवळील शिंदेळ रस्त्यावर घडली. या घटनेत सैय्यद सबदर सैय्यद इस्माईल (वय ५८, नगरदेवळा. पाचोरा) यांचा जागीच मृत्यू झाला तर त्यांचा मुलगा सैय्यद आबीद हा गंभीर जखमी झाला आहे.

सैय्यद सबदर सैय्यद इस्माईल व त्यांचा मुलगा सैय्यद आबीद हे शेतात रोजंदारी कामावरून घराकडे नगरदेवळा येथे परतत असताना वडाच्या झाडावर बसलेल्या मधमाशांचा पोळ अचानक उठल्यानंतर मधमाशांनी डंख मारणे सुरु केल्याने सबदर यांचा जागीच मृत्यू झाला. तर मुलगा आबीद हा गंभीर जखमी झाला आहे.

अत्यवस्थ अवस्थेत त्यास पाचोरा येथे हलवण्यात आले व तेथून जळगाव जिल्हा रुग्णालयात हलवण्यात आलं. मयत सैय्यद यांच्या पश्चात पत्नी, दोन मुले, तीन मुली असा परिवार आहे. त्यांच्या परिवाराची आर्थिक परिस्थिती हालाखीची असल्याने शासनाकडून त्यांच्या परिवाराला आर्थिक मदत मिळावी, अशी सर्वांची अपेक्षा आहे.

न्यूज अनकट प्रतिनिधी: अमोल बारवकर