पंजाब पोलिसांची मोठी कारवाई ; अमृतपाल चा जवळचा साथीदार अटकेत

पंजाब, १० एप्रिल २०२३: ‘वारिस पंजाब दे’ चा प्रमुख खलिस्तानी समर्थक अमृतपाल सिंगचा जवळचा साथीदार पपलप्रीत सिंग याला पकडण्यात पंजाब पोलिसांना यश आले आहे. पंजाब पोलीस आणि काउंटर इंटेलिजन्स युनिटने केलेल्या कारवाईत होशियापूर येथून अमृतपालचा साथीदाराला पंजाब पोलिसांनी अटक केली आहे. सुत्रांनी दिलेल्या माहितीनुसार, पपलप्रीतने त्याच्या कुटुंबीयाशी संपर्क साधला आणि त्यानंतर तो होशियापूरमध्ये असल्याची माहिती पोलिसांना मिळाली होती.

यानंतर पंजाब पोलीस आणि काउंटर इंटेलिजन्स टिमने केलेल्या कारवाईत पपलप्रीतला अटक करण्यात आली आहे. आता पंजाब पोलीस त्यांची चौकशी करून, अमृतपालवरच्या मुसक्या आवळण्याच्या तयारीत आहेत. अमृतपालपर्यत पोहोचण्यासाठी पपलप्रीत अतिशय महत्त्वाचा दुवा असल्याचे देखील पोलिसांनी म्हटले आहे.

अमृतपाल सोबत सावली सारखा असणारा त्याचा अगदी जवळचा साथीदार पपलप्रीत सिंग हा वेगळा झाला होता. त्यानंतर २७ मार्चच्या दरम्यान अमृतपालसोबत पपलप्रीत फगवाडाहून होशियापूरला आला होता. त्यानंतर ते तेथून बाहेर पडून दोन वेगळ्या वाटांना गेले. अमृतपाल सिंग अमृतसरला तर पपलप्रीत फगवाडाला पळाल्याची माहिती पोलिसांना मिळाली होती. त्यानुसार ही मोठी कारवाई करण्यात आली असं पंजाब पोलिसांनी सांगितले आहे.

न्यूज अनकट प्रतिनिधी: अमोल बारवकर