नवी दिल्ली, 29 नोव्हेंबर 2021: निती आयोगाने अलीकडेच पहिला बहुआयामी गरीबी निर्देशांक (MPI) प्रसिद्ध केलाय. त्यानुसार बिहार, झारखंड आणि उत्तर प्रदेश ही भारतातील सर्वात गरीब राज्ये म्हणून पुढे आली आहेत. इतकंच नाही तर आयोगाच्या या अहवालात केरळ, गोवा, सिक्कीम या राज्यांना सर्वात कमी दारिद्र्य असलेले राज्य म्हणून संबोधण्यात आले आहे.
अहवालानुसार बिहारमधील 51.91% लोक गरीब आहेत. त्याच वेळी, झारखंडमधील 42.16% लोकसंख्या आणि उत्तर प्रदेशातील 37.79% लोक गरीब आहेत. त्याचबरोबर या यादीत चौथा क्रमांक मध्य प्रदेशचा आहे. मध्य प्रदेशातील 36.65% लोकसंख्या गरीब आहे. त्याच वेळी, मिझोराम 32.67% गरीब लोकसंख्येसह या यादीत 5 व्या क्रमांकावर आहे.
केरळ सर्वात कमी गरीब राज्य
निती आयोगाच्या MPI नुसार, केरळमधील केवळ 0.71% लोकसंख्या गरीब आहे. त्याच वेळी, गोव्यात 3.76%, सिक्कीममध्ये 3.82% आणि तामिळनाडूमध्ये 4.89% गरीब आहेत. ही राज्ये देशातील सर्वात कमी दारिद्र्य असलेली राज्ये आहेत.
केंद्रशासित प्रदेशांमध्ये सर्वात गरीब कोण आहे
दुसरीडं, केंद्रशासित प्रदेशांचा विचार करता दादरा नगर हवेली (27.36%), जम्मू आणि काश्मीर आणि लडाख (12.58%), दमण आणि दीव (6.82%) आणि चंदीगड (5.97%) सर्वात गरीब आहेत. पुद्दुचेरीमधील केवळ 1.72% लोकसंख्या गरीब आहे. तर लक्षद्वीपमध्ये 1.82%, अंदमानमध्ये 4.30% आणि दिल्लीत 4.79% गरीब आहेत.
कुपोषणातही बिहार पहिल्या क्रमांकावर आहे
बिहारमध्ये कुपोषित लोकांची संख्या सर्वाधिक आहे, त्यानंतर झारखंड, मध्य प्रदेश, उत्तर प्रदेश आणि छत्तीसगडचा क्रमांक लागतो. त्याच वेळी, आरोग्य, शिक्षण, शाळेतील उपस्थिती आणि स्वयंपाकाचे इंधन आणि वीज यापासून वंचित असलेली लोकसंख्या या बाबींमध्ये बिहारची कामगिरी सर्वात वाईट आहे.
बाल आणि किशोरवयीन मृत्यू दर श्रेणीत उत्तर प्रदेश सर्वात खालच्या क्रमांकावर आहे. यानंतर बिहार, मध्यप्रदेश आणि झारखंडचा क्रमांक लागतो. स्वच्छतेपासून वंचित असलेल्या लोकसंख्येचा विचार केला तर त्यातही बिहार आणि ओडिशा पुढे आहेत.
न्यूज अनकट प्रतिनिधी: ईश्वर वाघमारे
