पुणे, २४ डिसेंबर २०२२ : भाजपचे जिल्हाध्यक्ष आणि विद्यमान आमदार जयकुमार गोरे यांच्या वाहनाला फलटण येथे अपघात झाला आहे. या अपघातात जयकुमार गोरे हे गंभीर जखमी झाले आहेत. अधिक उपचारासाठी त्यांना तातडीने पुणे शहरातील खासगी रुग्णालयात उपचारासाठी दाखल करण्यात आले आहे.
भारतीय जनता पक्षाचे जिल्हाध्यक्ष आणि विद्यमान आमदार जयकुमार गोरे यांच्या गाडीचा फलटण-लोणंद रस्तावर अपघात झाला. फलटण शहरानजीक स्मशानभूमीजवळ बाणगंगा नदीवरील पुलावरून गाडी पन्नास फूट खाली कोसळून हा अपघात झाला आहे. पहाटे तीनच्या सुमारास आमदार जयकुमार गोरे हे लोणंदकडून फलटणच्या दिशेने येत होते.
यावेळी चालकाला पुलाचा अंदाज न आल्याने गाडी पुलावरून खाली कोसळली. यामध्ये आमदार जयकुमार गोरेंसह त्यांचे स्वीय सहायक, बॉडीगार्ड आणि चालक असे चौघेजण या अपघातात जखमी झाले आहेत. आमदार जयकुमार गोरे यांनी जखमी अवस्थेत मोबाईलवरून खासदार रणजितसिंह नाईक निंबाळकर यांना याबाबत कळविताच त्यांनी पुढील चक्रे फिरवून जखमींना फलटण, बारामती आणि पुणे येथे दाखल करण्यात आले आहे.
न्यूज अनकट प्रतिनिधी : अमोल बारवकर
