बूट लपावल्यामुळे मोडल लग्न

मुझफ्फरनगर: एका लग्नसोहळ्यात वधूपक्षाकडील काही तरुणींनी आणि महिलांनी नवरदेवाचे बूट लपवले. ते परत करण्यासाठी नवरदेवाकडे पैसे मागितले. त्यावर नवऱ्यामुलानं नाराजी व्यक्त केली. त्यानं त्या तरुणींना आणि महिलांना शीवीगाळ करण्यास सुरुवात केली. नवरीला याबाबत माहीत झालं. तिनं थेट लग्नच मोडलं. इतकंच नाही तर, हुंडा म्हणून दिलेले दहा लाख रुपये परत करण्याचे मान्य केल्यानंतरच नवरदेवासह वरातीत सहभागी झालेल्या लोकांना जाऊ दिलं. हुंड्यापोटी घेतलेले पैसे परत देत नाहीत, तोवर नवरदेव, त्याचे वडील आणि दोन नातेवाइकांना बंदिस्त केलं होतं. पैसे परत दिले जातील असं सांगितल्यानंतरच त्यांना सोडलं. ही घटना उत्तर प्रदेशच्या मुझफ्फरनगरमध्ये घडली आहे. सूत्रांच्या माहितीनुसार, वधूपक्षाच्या नातेवाइकांनी या घटनेनंतर नवरदेवाला समजावण्याचा प्रयत्नही केला होता. पण तो त्यांच्यावरही भडकला. अपशब्द वापरतानाच, त्यानं एका व्यक्तीच्या कानशिलातही लगावली. त्यानंतर वाद टोकाला गेला आणि नवरीकडील मंडळींनी लग्न मोडण्याचा निर्णय घेतला.
भोराकला पोलीस ठाण्याच्या हद्दीत ही घटना घडली. लग्नसोहळ्यातील वादाबाबत माहिती मिळाल्यानंतर पोलीस घटनास्थळी पोहोचले. पोलीस अधिकारी वीरेंद्र कसाना यांनी सांगितले की, ‘वर किंवा वधूपक्षाकडून कोणतीही तक्रार करण्यात आली नाही. पोलीस ठाण्याबाहेरच दोन्हीकडील मंडळी तडजोड करण्यास तयार झाले.’ या प्रकरणात भारतीय किसान यूनियनचे अध्यक्ष नरेश टिकैत यांनाही मध्यस्थी करावी लागली. नवऱ्यामुलीची समजूत काढण्याचा प्रयत्न केला. पण ती लग्नास तयार झाली नाही, असं त्यांनी सांगितलं.