बुमराह-रोहितची धमाल, भारता कडून इंग्लंडचा 10 विकेट्सनी पराभव

Ind Vs Eng 1st ODI, 13 जुलै 2022: ओव्हल येथे खेळल्या गेलेल्या पहिल्या वनडे सामन्यात टीम इंडियाने दणदणीत विजय मिळवला आहे. इंग्लंडला केवळ 110 धावांत गुंडाळल्यानंतर भारताने हा सामना 10 गडी राखून जिंकला आहे. रोहित शर्मा आणि शिखर धवन या जोडीला बाद करताना इंग्लंडला घाम फुटला, दोघांनीही हे लक्ष्य केवळ 19 व्या षटकातच गाठले. यासह टीम इंडिया आता तीन सामन्यांच्या मालिकेत 1-0 ने पुढे आहे.

टीम इंडिया बर्‍याच दिवसांनी एकदिवसीय सामना खेळत होती, परंतु येथे संपूर्ण षटके होऊ शकली नाहीत. या सामन्यात फक्त 44 षटके टाकण्यात आली, म्हणजेच एका डावात जितकी षटके टाकता येतील तितकीही षटके टाकली गेली नाहीत. कारण इंग्लंडचा डाव 25.2 षटकांपर्यंत चालला, तर भारताने हे लक्ष्य 18.4 षटकांत पूर्ण केले.

जसप्रीत बुमराहच्या 6 विकेट्ससमोर इंग्लंडचा संघ केवळ 110 धावाच करू शकला. ही इंग्लंडची भारताविरुद्धची वनडेतील सर्वात कमी धावसंख्या होती. प्रत्युत्तरात रोहित शर्मा आणि शिखर धवन या सलामीच्या जोडीने पुन्हा एकदा वनडेत आपला ठसा उमटवला.

टीम इंडियाकडून कर्णधार रोहित शर्माने 76 धावांची इनिंग खेळली. रोहितने हा पराक्रम केवळ 58 चेंडूंमध्ये केला, ज्यात 7 चौकार आणि 5 षटकारांचा समावेश होता. शिखर धवनने नाबाद 31 धावा करताना विजयी चौकारही लगावला.

टीम इंडियाची दमदार फलंदाजी

कर्णधार रोहित शर्मा आणि शिखर धवन ही जोडी प्रदीर्घ काळानंतर एकत्र आली.दोघांनीही इंग्लंडच्या गोलंदाजांना एकही संधी दिली नाही आणि अवघ्या 110 धावांचा पाठलाग करताना टीम इंडियाला दमदार सुरुवात करून दिली. रोहित-शिखरनेही या काळात मोठी धावसंख्या उभारली आणि जोडीदार म्हणून वनडेत 5000 धावा पूर्ण केल्या. रोहित शर्मा आणि शिखर धवन यांच्यातील वनडे क्रिकेटमधील ही 18वी शतकी भागीदारी होती.

भारतीय गोलंदाजांनी कहर केला

जसप्रीत बुमराहने या सामन्यात कहर केला, त्याने अवघ्या 19 धावांत 6 विकेट घेतल्या. जी त्याची एकदिवसीय क्रिकेटमधील सर्वोत्तम गोलंदाजी आहे. जसप्रीत बुमराहशिवाय मोहम्मद शमीने 3 आणि प्रसिद्ध कृष्णाने एक विकेट घेतली.

टीम इंडियाची गोलंदाजी किती धोकादायक होती, याचा अंदाज इंग्लंडच्या चार फलंदाजांना खातेही उघडता आले नाही. त्याशिवाय इंग्लंडने त्यांचे सुरुवातीचे तीन विकेट अवघ्या 7 धावांवर आणि 26 धावांवर पाच विकेट गमावल्या होत्या.

टीम इंडियाची गोलंदाजी

मोहम्मद शमी – 7 षटके, 31 धावा, 3 विकेट
जसप्रीत बुमराह – 7.2 षटके, 19 धावा, 6 विकेट्स
प्रसिध कृष्ण – 5 षटके, 26 धावा, 1 बळी

न्यूज अनकट प्रतिनिधी: ईश्वर वाघमारे