सीडीएस जनरल बिपिन रावत यांना 21 मार्च रोजी पद्मविभूषणने सन्मानित करण्यात येणार

नवी दिल्ली, 19 मार्च 2022: देशातील पहिले सीडीएस जनरल बिपिन रावत यांना 21 मार्च रोजी पद्मविभूषण पुरस्काराने सन्मानित करण्यात येणार आहे. हा सन्मान त्यांना मरणोत्तर देण्याची घोषणा करण्यात आली. 21 मार्च रोजी त्यांच्या मुली कृतिका आणि तारिणी यांना राष्ट्रपती रामनाथ कोविंद यांच्याकडून हा सन्मान मिळणार आहे. यावर्षी 21 आणि 28 मार्च रोजी राष्ट्रपतींच्या हस्ते पद्म पुरस्कार प्रदान केले जाणार आहेत. 26 जानेवारी रोजी 128 जणांना पद्म पुरस्काराने सन्मानित करण्याची घोषणा करण्यात आली. त्यापैकी चार पद्मविभूषण, 17 पद्मभूषण आणि 107 जणांना पद्मश्रीने सन्मानित करण्यात येणार आहे.

सीडीएस रावत यांचा हेलिकॉप्टर अपघातात मृत्यू

सीडीएस जनरल रावत यांचा गेल्या वर्षी 8 डिसेंबर रोजी तामिळनाडूमध्ये हेलिकॉप्टर अपघातात मृत्यू झाला होता. पद्मविभूषण हा भारत सरकारकडून दिला जाणारा दुसरा सर्वोच्च नागरी सन्मान आहे. जनरल बिपिन रावत यांना 31 डिसेंबर 2019 रोजी देशातील पहिल्या सीडीएसची जबाबदारी देण्यात आली. सीडीएस पद सोपवण्यापूर्वी ते देशाचे 27 वे लष्करप्रमुख होते.

उत्तराखंडमधील पौरी गढवालचे होते रावत

उत्तराखंडच्या पौरी गढवाल येथील सैन गावचे असलेले सीडीएस जनरल बिपिन रावत यांचे वडील लक्ष्मण सिंह रावत हेही लष्कराचे उपप्रमुख म्हणून निवृत्त झाले. जनरल रावत यांनी शिमला येथील सेंट एडवर्ड स्कूल आणि नॅशनल डिफेन्स अकादमी, खर्गवासला येथे शिक्षण घेतले. डिसेंबर 1978 मध्ये, त्यांना इंडियन मिलिटरी अकादमीमधून गोरखा रायफल्सच्या 5 व्या बटालियनमध्ये नियुक्त करण्यात आले.

अलीकडेच त्यांच्या 64 व्या वाढदिवसानिमित्त दिल्लीतील इंडिया इंटरनॅशनल सेंटरमध्ये पहिले स्मृती व्याख्यान आयोजित करण्यात आले होते. ‘एचीविंग सेल्फ रिलांयस’ या विषयावर आयोजित या व्याख्यानाचे माजी हवाई दल प्रमुख आरकेएस भदौरिया हे प्रमुख वक्ते होते. CDS पदावर असताना जनरल रावत यांनी संरक्षण उत्पादन क्षेत्रात स्वावलंबी होण्याचे व्हिजन पुढे नेले. भारताला बलशाली राष्ट्र बनायचे असेल तर स्वदेशी शस्त्रास्त्रांचे उत्पादन वाढवावे लागेल, असे त्यांचे मत होते.

लष्करप्रमुख जनरल एमएम नरवणे यांनी सीडीएस जनरल बिपिन रावत यांच्या स्मरणार्थ ‘युनायटेड सर्व्हिस इन्स्टिट्यूशन ऑफ इंडिया’ (यूएसआय) या सर्वोच्च लष्करी थिंक टँकमध्ये ‘चेयर ऑफ एक्सीलेंस’ स्थापन करण्याची घोषणा केली आहे. उत्तराखंडच्या दून विद्यापीठात सीडीएस जनरल बिपिन रावत यांच्या स्मरणार्थ मेमोरियल व्याख्यानमालाही सुरू करण्यात आली आहे.

न्यूज अनकट प्रतिनिधी: ईश्वर वाघमारे