चीन सीमेवर करत आहे सीमा कराराचे उल्लंघन- एस परराष्ट्रमंत्री जयशंकर

नवी दिल्ली, २२ ऑगस्ट २०२२: भारताचे परराष्ट्र मंत्री एस जयशंकर यांनी पुन्हा एकदा चीनबाबत मोठे वक्तव्य केले आहे. जयशंकर म्हणाले की, चीन सीमा कराराचे उल्लंघन करत आहे. आणि या करारांना स्पष्टपणे बायपास करत आहे. परराष्ट्र मंत्री रविवारी ब्राझीलमध्ये एका सामुदायिक कार्यक्रमात बोलत होते.

जयशंकर यांनी ब्राझीलमधील साओ पाउलो येथे भारतीय समाजाशी संवाद साधताना ही माहिती दिली. ते म्हणाले की, नातेसंबंध विश्वासाच्या पायावर बांधले जातात. एकमेकांबद्दलचा आदरच नात्याला पुढे नेतो. नाते घट्ट करण्यासाठी एकमेकांचा आदर करणे आवश्यक आहे. पण, चीनच्या बाबतीत तसे नाही. चीनने सीमेवर सीमा कराराचे उल्लंघन केले आहे. चीनने सीमा भागात आणि गलवानमध्ये जे काही केले ते सीमा कराराचे उल्लंघन आहे.

ब्राझीलमधील भारतीयांचे आभार

परराष्ट्र मंत्री जयशंकर म्हणाले की, भारत-ब्राझील संबंध सद्भावना आणि वाढत्या सहकार्यावर आधारित आहेत. दोन्ही देशांमधला पूल म्हणून काम करणाऱ्या भारतीय डायस्पोराबद्दल त्यांनी कृतज्ञता व्यक्त केली. जयशंकर म्हणाले की, भारताच्या स्वातंत्र्याला ७५ वर्षे पूर्ण झाली आहेत. आज आपण स्वातंत्र्याची ७५ वर्षे साजरी करत आहोत. देशाचा मूड खूप आशावादी आहे. हा भारत महान गोष्टी करण्यास सक्षम आहे. युक्रेन-रशिया संघर्षादरम्यान आम्ही संघटित प्रयत्नांद्वारे मोठ्या संख्येने लोकांना बाहेर काढले आहे.

पूर्व लडाखमध्ये भारत आणि चीन यांच्यात संघर्ष सुरू आहे. दोन्ही देशांचे सैन्य आमनेसामने आहेत. ५ मे २०२० रोजी प्रथमच दोन्ही बाजूंमधील संघर्ष समोर आला. पंगांग तलाव परिसरात हिंसक हाणामारी झाली. गतिरोध संपवण्यासाठी दोन्ही देशांमध्ये आतापर्यंत कॉर्प्स कमांडर स्तरावरील चर्चेच्या १६ फेऱ्या पूर्ण झाल्या आहेत. मात्र, आजतागायत तोडगा निघालेला नाही.

थायलंडच्या भेटीदरम्यान जयशंकर यांनी भारत आणि चीनमधील सध्याच्या संबंधांबद्दल मोकळेपणाने चर्चा केली. जयशंकर यांनी आशियाई शतकाच्या शक्यतेबाबतही भूमिका स्पष्ट केली होती. भारत आणि चीन एकत्र येतील तेव्हाच आशिया खंडाचे स्वप्न साकार होईल, असे ते म्हणाले. पण भारत आणि चीन एकत्र आले नाहीत तर हे शक्य होणार नाही.

भारत-चीन संबंधांचा कठीण काळ

सीमेवर चीनने जे काही केले त्यानंतर दोन्ही देशांचे संबंध अत्यंत कठीण टप्प्यातून जात असल्याचेही ते म्हणाले. १५ जून २०२० रोजी गलवान व्हॅलीमध्ये चीनी सैनिक भारतीय सीमेत घुसले होते, त्यानंतर भारत आणि चीनच्या सैनिकांमध्ये हिंसक चकमक झाली होती.

न्यूज अनकट प्रतिनिधी: ईश्वर वाघमारे