लसणाची फोडणी महागणार; घाऊक बाजारात किलोमागे १० ते २० रुपयांनी वाढ

चांगल्या लसणाचे दर वाढत आहेत. शाकाहारी असो किंवा मांसाहारी, लसणाचा वापर दोन्ही प्रकारच्या जेवणात होतोच. त्यामुळे बाजारात कांद्याप्रमाणेच आता लसणाची मागणी वाढत आहे.

नवी मुंबई, ३ जानेवारी २०२३ : लसणाच्या नवीन पिकाचे उत्पादन फेब्रुवारी महिन्यात सुरू होणार आहे. त्यामुळे सध्या बाजारात जुनाच लसूण येत आहे. हा लसूण आता संपत आल्याने बाजारात येणाऱ्या लसणात चांगल्या लसणाचे प्रमाण कमीच असून, हलक्या दर्जाचा लसूण बाजारात जास्त प्रमाणात येत आहे. त्यामुळे बाजारातील मागणी आणि पुरवठ्याचे गणित बिघडले असून, त्याचा परिणाम लसणाच्या दरावर झाला आहे. परिणामी वाशीच्या घाऊक बाजारात लसणाचा दर किलोमागे १० ते २० रुपयांनी वाढला आहे. आतापर्यंत ३० ते ६० रु. किलो असलेला लसूण आता मात्र ५० ते १०० रुपयांवर गेला आहे. त्यामुळे घराघरांतील लसणाची फोडणी महागण्याची चिन्हे आहेत.

वाशी येथील घाऊक बाजारात सध्या दररोज १० ते १२ वाहनांधून लसणाची आवक होत आहे.ही वाहने मध्यप्रदेश आणि गुजरातमधून येत आहेत; मात्र त्यात चांगल्या दर्जाचा लसूण फारच कमी आहे. त्यामुळे चांगल्या लसणाचे दर वाढत आहेत. शाकाहारी असो किंवा मांसाहारी, लसणाचा वापर दोन्ही प्रकारच्या जेवणात होतोच. त्यामुळे बाजारात कांद्याप्रमाणेच आता लसणाची मागणी वाढत आहे. चांगल्या दर्जाचा उत्तम लसूण घाऊक बाजारात ३० ते ६० रु. किलो दराने विकला जात होता; मात्र आता त्याचे दर ५० ते १०० रु. किलो झाले आहेत. तर दुय्यम दर्जाचा २० ते ४० रु. किलो दर असणारा लसूण आता ३० ते ५० रु. किलो झाला आहे.

नवीन लसणाची प्रतीक्षा
फेब्रुवारीनंतर बाजारात नवीन लसूण यायला सुरवात होईल, तेव्हा हे दर खाली यायला सुरवात होण्याची शक्यता आहे. त्यातही नवीन उत्पादन कसे येते, यावर बाजारभाव अवलंबून राहणार असल्याची माहिती व्यापारी मनोहर तोतलानी यांनी दिली आहे.

चांगल्या दर्जाचा उत्तम लसूण
आधीचा दर ३० ते ६० रु. किलो
सध्याचा दर ५० ते १०० रु. किलो

दुय्यम दर्जाचा लसूण
आधीचा दर २० ते ४० रु. किलो
सध्याचा दर ३० ते ५० रु. किलो

‘न्यूज अनकट’ प्रतिनिधी : सतीश पाटील