पुणे, २१ डिसेंबर २०२२ पाणी आणि मानवी जीवन यांचं नातं अतूट आहे. नुकत्याच प्रदर्शित झालेल्या ‘अवतार : द वे ऑफ वॅाटर’ या हॅालिवूड चित्रपटात प्रगत तंत्रज्ञानाच्या आधारे पाण्याखालचे विश्व दाखवण्यात आले आहे. तंत्रज्ञानाच्या या शर्यतीत मराठी चित्रपटही कुठेच मागे नसल्याचे दर्शवणारा सुपर नॅचरल थ्रीलर ‘गडद अंधार’ हा चित्रपट ३ फेब्रुवारी २०२३ ला प्रेक्षकांच्या भेटीला येणार आहे.
या चित्रपटाचा टिझर नुकताच सोशल मीडियाद्वारे लाँच करण्यात आला आहे. या चित्रपटात नेमके काय पहायला मिळणार याबाबतचे कुतूहल जागं करणाऱ्या या टिझरला नेटकऱ्यांचा भरभरून प्रतिसाद मिळत असून, सिनेप्रेमींद्वारे ‘गडद अंधार’चा टिझर शेअर करण्यात येत आहे.
इलुला फिचर व्हिजन प्रा. लि.च्या बॅनरखाली निर्माते कॅप्टन अवधेश सिंग आणि वर्षा सिंग यांनी या चित्रपटाची निर्मिती केली असून, दिग्दर्शक प्रज्ञेश रमेश कदम यांनी या चित्रपटाचे दिग्दर्शन केले आहे. ‘गडद अंधार’ या अनोख्या टायटलमुळे चर्चेत असलेल्या या थ्रिलरपटाचा टिझरही अतिशय रोमांचक आहे. पाण्यात उडी मारण्यापूर्वी बोटीत असलेला नायक-नायिका, समुद्राच्या तळाशी अंधाऱ्या गुहेत जाण्याचा त्यांचा प्रयत्न, पाण्याखालचे मनमोहक दृश्ये टिपणाऱ्या कॅमेऱ्याची जादू या टिझरमध्ये पहायला मिळते.
या चित्रपटाबद्दल सांगताना दिग्दर्शक प्रज्ञेश कदम म्हणाले की, या चित्रपटाचा टिझर खऱ्या अर्थाने चित्रपटाची झलक दाखवणारा आहे. याद्वारे रसिकांना एका वेगळ्या विश्वात घेऊन जाताना ‘गडद अंधार’च्या टिमला खूप आनंद होत आहे. ‘गडद अंधार’ या टायटलमधील अंधारात प्रेक्षकांना कोणता प्रकाशकिरण दिसणार आणि त्यातून कथानकातील कोणते पैलू उलगडणार हे चित्रपट पाहिल्यावरच समजेल. सर्व कलाकार आणि तंत्रज्ञांनी या चित्रपटासाठी कठोर परिश्रम घेतले असल्याचेही त्यांनी यावेळी सांगितले.
