नागपूर, 30 एप्रिल 2022: राज्याचे उपमुख्यमंत्री अजित पवार आणि गृहमंत्री दिलीप वळसे पाटील यांनी काल अचानक केंद्रीय मंत्री नितीन गडकरी यांची भेट घेतली. या अचानक घेतलेल्या भेटीमुळं राजकीय वर्तुळात चर्चांना उधाण आलं आहे. नागपुरात पोलीस भवनाच्या उद्घाटनाच्या कार्यक्रमानंतर अजित पवार नागपूर जिल्ह्यातील सावनेरला पोलीस स्टेशनच्या लोकार्पण कार्यक्रमासाठी गेले होते. तेथून नागपूरला परत आल्यानंतर अजित दादा दिलीप वळसे पाटील यांच्यासह थेट नितिन गडकरी यांच्या वर्धा रोडवरील घरी त्यांच्या भेटीला गेले. सुमारे अर्धा तास तिघांची भेट रंगली. विशेष म्हणजे यावेळी माजी मंत्री अनिल देशमुख यांचे ज्येष्ठ चिरंजीव देशमुख उपस्थित होते.
या भेटीची चर्चा होण्यामागं राज्यातील सध्या सुरू असलेल्या घडामोडी देखील आहे. एकीकडं मुंबईमध्ये वर्षा बंगल्यावर उद्धव ठाकरे यांची शिवसेनेच्या मंत्र्यांसोबत बैठक सुरू आहे. तर दुसरीकडं राज ठाकरे यांचा औरंगाबाद दौरा आणि होणारी सभा चर्चेत आहे. काल त्यांनी पुण्याला देखील भेट दिली. अशातच अजित पवार, दिलीप वळसे-पाटील यांनी गडकरींची घेतलेली भेट चर्चेचा विषय ठरणारच.
सावनेरवरून परत आल्यानंतर अजित पवार यांचे प्रेमनगर परिसरात राष्ट्रवादी काँग्रेसच्या नगरसेविका आभा पांडे यांच्या प्रभागात कार्यक्रमात पोहोचण्याआधी अचानकच नितीन गडकरी यांना भेटण्यासाठी गेल्याची माहिती आहे. नितिन गडकरी यांनी मागील वर्षी रस्ते विकासासाठी केंद्राच्या निधीतून महाराष्ट्राला चांगला वाटा दिला होता. या वर्षी त्यांच्याकडून तसंच सहकार्य मिळावं. याबद्दल त्यांची भेट घेतल्याची माहिती अजित पवार यांनी दिलीय.
रेल्वे ओव्हरब्रिज तसेच रेल्वे अंडरब्रीज संदर्भात काही निधी नितीन गडकरी यांच्या विभागाकडे असून त्याची आम्हाला माहिती मिळाल्यावर महाराष्ट्रातील सर्वच विभागातील रेल्वे ओव्हर ब्रिज आणि अंडर ब्रिज या निधीतून व्हावे ही मागणी ही त्यांच्या समोर ठेवली आहे. तसेच जीएसटीमध्ये महाराष्ट्राच्या वाट्या संदर्भातही त्यांच्याशी सकारात्मक बोलणं झालंय असं अजित पवार म्हणाले.
न्यूज अनकट प्रतिनिधी: ईश्वर वाघमारे
