गडचिरोली, २४ सप्टेंबर २०२३ : पोलीसांचा घातपात करण्याच्या हेतूने, नक्षल्यांनी गडचिरोलीमध्ये कोरची तालुक्यातील बेळगाव घाट जंगल परिसरात जमिनीत स्फोटके पुरुन ठेवली होती. ही स्फोटके शोधून काढण्यात गडचिरोली पोलिसांना यश आले आहे. गडचिरोली नक्षलविरोधी पथकाने स्फोटके जप्त करण्याची कारवाई केली. गुरुवारपासून नक्षलवाद्यांच्या वर्धापन सप्ताहाला सुरुवाती झालीय. या पार्श्वभूमीवर जिल्ह्यात नक्षलवादी सक्रीय झाले आहेत.
कुरखेडा उपविभागांतर्गत बेळगाव पोलीस मदत केंद्र हद्दीत पुराडा पोलीस ठाण्यातील जवान हे नक्षलविरोधी अभियान राबवित होते. कोरची व टिपागड दलमच्या नक्षलवाद्यांनी, मोठा घातपात घडवून आणण्याच्या उद्देशाने मोठ्या प्रमाणात स्फोटके व इतर साहित्य पुरुन ठेवले असल्याची माहिती मिळताच जंगलात शोधमोहीम राबवली गेली. यावेळी जमिनीत अंदाजे दीड ते दोन फूट खोल स्फोटक पदार्थ भरून असलेले चार पाकीट आढळून आले.
यामध्ये ११.८ किलो स्फोटके होती. बाॅम्ब शोधक व नाशक पथकाने ही स्फोटके नष्ट केली. पोलीस अधिक्षक नीलोत्पल, अप्पर अधीक्षक अनुज तारे, यतीश देशमुख यांच्या मार्गदर्शनाखाली पुराडा ठाण्याचे सहाय्यक निरीक्षक भूषण पवार व जवानांनी ही कारवाई केली. बेळगांव ठाण्यात गुन्हा नोंद केला असून उपनिरीक्षक लक्ष्मण अक्कमवाड तपास करीत आहेत.
न्युज अनकट प्रतिनिधी : अमोल बारवकर
