फिदायीन हल्ल्याची होती योजना, सैनिकांवर ग्रेनेड हल्ला, सर्व दहशतवाद्यांना कंठस्नान

जम्मू कश्मीर, २३ एप्रिल २०२२ : जम्मूच्या सुंजवान भागात सुरक्षा दलांची दहशतवाद्यांशी भीषण चकमक झाली. या चकमकीत जैशचे दोन दहशतवादी मारले गेले. मात्र कारवाईदरम्यान एक जवानही शहीद झाला असून चार जण जखमी झाले आहेत. आता संपूर्ण परिसराची नाकेबंदी करण्यात आलीय आणि शोध मोहीम सुरू आहे, काही सुगावा सापडले आहेत जे मोठ्या दहशतवादी हल्ल्याकडे बोट दाखवत आहेत.

सुंजवानमध्ये दहशतवादी आत्मघातकी हल्ला करू शकतात, अशी सूचना मिळाल्याची माहिती डीआयजी अनिल पांडे यांनी दिलीय. तेथे जैशचे दहशतवादी सक्रिय असल्याचे सांगण्यात आलं. अशा परिस्थितीत तेथे शोधमोहीम राबवण्यात आली आणि त्यानंतर दहशतवाद्यांशी चकमक सुरू झाली. या चकमकीत दोन्ही दहशतवादी ठार झाले आहेत.

खरं तर, या चकमकीपूर्वी शुक्रवारी पहाटे साडेचार वाजता दहशतवाद्यांनी चाथा कॅम्पजवळ सीआरपीएफच्या बसवर ग्रेनेड हल्ला केला होता. त्यावेळी बसमध्ये १५ सैनिक होते. त्या ग्रेनेड हल्ल्यानंतरच सुरक्षा दल सक्रिय झाले आणि त्यानंतर सुंजवानमध्ये चकमक सुरू झाली. सुमारे पाच तास सतत गोळीबार सुरू होता. यामध्ये जैशच्या दोन्ही दहशतवाद्यांना कंठस्नान घालण्यात आले आहे. या चकमकीत एक जवान शहीद आणि ४ जवान जखमी झाले असून त्यांच्यावर उपचार सुरू आहेत.

शहीद जवान सीआयएसएफचे एएसआय एसपी पटेल आहेत. कठुआचे पोलिस हेडकॉन्स्टेबल बलराज सिंह, अखनूरचे एसपीओ साहिल शर्मा, ओडिशाचे सीआयएसएफचे प्रमोद पात्रा आणि आसामचे अमीर सोरण हे जखमी झाले आहेत.

आता तपासादरम्यान घटनास्थळावरून काही औषधांची पाकिटेही एजन्सींनी जप्त केली आहेत. त्या औषधांवर उर्दूमध्ये काही मार्किंग आहे. ही औषधे पाकिस्तानमध्ये तयार करण्यात आल्याचे सांगण्यात येत आहे. अशा परिस्थितीत हे दहशतवादी सुंजवानमध्ये पाकिस्तानातून आले होते, अशी भीती व्यक्त केली जात आहे.

तसे पाहता, हा सुंजवान हल्ला ज्या पद्धतीने करण्यात आला, त्याची तुलना २०१६ मधील पठाणकोट हल्ल्याशी केली जात आहे. त्यानंतर २ जानेवारीला पहाटे ३.३० च्या सुमारास दहशतवादी शस्त्रांसह पठाणकोट एअरबेसमध्ये घुसले होते. कटाचा एक भाग म्हणून ते दहशतवादी लष्कराच्या गणवेशात हल्ला करण्यासाठी आले होते. तिथे फिदाईन हल्ल्याची तयारी होती, पण त्यांना घेरल्यावर त्यांनी सैनिकांवर ग्रेनेड फेकले आणि गोळीबाराची फेरी सुरू झाली.

या हल्ल्यात सात जवान शहीद झाले असून ३७ जण जखमी झाले आहेत. प्रत्युत्तरादाखल सर्व दहशतवाद्यांनाही ठार करण्यात आले. सुंजवानमधील हल्ल्याबाबत बोलायचं झालं तर, तिथे फिदाईन हल्ल्याची तयारी होती, इथेही जवानांवर ग्रेनेड फेकले गेले. अशा परिस्थितीत ६ वर्षांनंतर पाकिस्तानातून आलेले हे दहशतवादी पुन्हा एकदा पठाणकोटसारखा हल्ला करण्याचा प्रयत्न करत असल्याचे बोलले जात आहे. पण दहशतवादी त्यांच्या योजनांमध्ये यशस्वी होऊ शकले नाही आणि त्यांना ठार मारण्यात आले.

न्यूज अनकट प्रतिनिधी : ईश्वर वाघमारे