तिरुवनंतपुरम, 12 डिसेंबर 2021: मल्याळम चित्रपट निर्माते अली अकबर यांनी एक धक्कादायक घोषणा केली असून, त्यानंतर ते चर्चेत आला आहे. अली अकबरने इस्लाम सोडून हिंदू होण्याचा निर्णय घेतला आहे. अली अकबर आणि त्यांचे कुटुंब हिंदू धर्म स्वीकारणार आहेत. चीफ ऑफ डिफेन्स स्टाफ बिपिन रावत यांच्या आकस्मिक निधनावर सोशल मीडियावर आलेल्या प्रतिक्रियांनंतर अली अकबर यांनी हा महत्त्वपूर्ण निर्णय घेतलाय. अली अकबर यांनी थेट व्हिडिओमध्ये सीडीएस बिपिन रावत यांच्या मृत्यूचा आनंद साजरा करणाऱ्यांचा निषेध केला होता.
अली अकबर यांनी सांगितले, त्यांचे नवीन नाव काय असेल
अली अकबर यांनी बुधवारी सांगितले की, त्यांचा मुस्लिम धर्मावरील विश्वास उडाला आहे. त्यामुळे आता ते आणि त्यांची पत्नी लुसिम्मा हिंदू बनण्यास तयार आहेत. अली अकबर यांनी आपले नवीन नाव निवडले आहे. ते आता अली अबकरकडून रामसिम्हन होणार आहे. त्यांनी सांगितले की, रामसिम्हन ही व्यक्ती होती ज्याची हत्या करण्यात आली कारण ते त्यांच्या संस्कृतीसाठी उभे होते. अली अकबर यांच्या म्हणण्यानुसार, रामसिम्हन हे नाव त्याच्यासाठी अगदी योग्य आहे.
अली अकबर यांनी लाईव्ह व्हिडिओमध्ये शूर लष्करी अधिकाऱ्याच्या मृत्यूवर प्रतिक्रिया देणाऱ्यांचा निषेध केला होता. कट्टरपंथीयांच्या विरोधात कोणताही धर्मगुरू उभा राहिला नाही हे पाहून अली अकबरही दुखावले गेले. जातीयवादी प्रतिक्रिया पाहिल्यानंतर अली अकबर यांनी त्यांचे जुने फेसबुक खाते निलंबित केले आणि नवीन खाते वापरून धर्म बदलण्याची घोषणा केली.
आपल्या मुलींना धर्मांतर करण्यास भाग पाडणार नाही आणि ते त्यांच्या मर्जीवर सोडणार असल्याचेही त्यांनी सांगितले. अली अकबर हे यापूर्वी भारतीय जनता पक्षाच्या राज्य समितीचे सदस्य होते. त्यानंतर पक्षनेतृत्वाशी मतभेद झाल्यानंतर त्यांनी आपल्या पदाचा राजीनामा दिला होता.
न्यूज अनकट प्रतिनिधी: ईश्वर वाघमारे
