नवी दिल्ली, २४ फेब्रुवारी २०२३: अमेरिकेचे अध्यक्ष जो बायडेन यांनी गुरुवारी माजी मास्टरकार्ड सीईओ अजय बंगा यांना जागतिक बँकेच्या प्रमुखपदासाठी नामांकित केलं आहे. अजय बंगा यांना जागतिक आव्हानांवर तसेच हवामान बदलाच्या आव्हानांवर काम करण्याचा चांगला अनुभव आहे. अजय बंगा हे भारतात जन्मलेले पहिले व्यक्ती आहेत ज्यांना जागतिक बँकेच्या प्रमुखपदासाठी नामांकन मिळालंय.
आतापर्यंत डेव्हिड मालपास हे जागतिक बँकेच्या सर्वोच्च पदावर होते. गेल्या आठवड्यात डेव्हिड मालपास यांनी मुख्य पदाचा राजीनामा देण्याची घोषणा केली. जागतिक बँकेने बुधवारी सांगितलं की ते मे महिन्याच्या सुरुवातीला डेव्हिड मालपास यांच्या जागी नवीन अध्यक्ष निवडू शकतात. जागतिक बँक १८९ देशांचं नेतृत्व करते ज्यांनी गरिबी दूर करण्याचं उद्दिष्ट ठेवलंय.
बंगा यांना ३० वर्षांचा अनुभव
अजय बंगा सध्या जनरल अटलांटिक या प्रायव्हेट इक्विटी फर्मचे उपाध्यक्ष आहेत. बंगा यांना ३० वर्षांपेक्षा जास्त व्यवसायाचा अनुभव आहे. मास्टरकार्डमध्ये वेगवेगळ्या जबाबदाऱ्या सांभाळल्यानंतर ते दीर्घकाळ सीईओ होते. याशिवाय त्यांनी अमेरिकन रेड क्रॉस, क्राफ्ट फूड्स आणि डाऊ इंक मध्ये काम केलं.
बायडेन म्हणाले की, अजयने तीन दशकांहून अधिक काळ यशस्वी, जागतिक कंपन्यांची निर्मिती आणि व्यवस्थापन केलंय. या अशा कंपन्या आहेत ज्या रोजगार निर्माण करतात आणि विकसनशील अर्थव्यवस्थांमध्ये गुंतवणूक आणतात… ते म्हणाले की लोक आणि प्रणाली व्यवस्थापित करण्यासाठी आणि परिणाम देण्यासाठी जगभरातील जागतिक नेत्यांसोबत भागीदारी करण्याचा त्यांचा चांगला ट्रॅक रेकॉर्ड आहे.
अजय बंगा यांना नामनिर्देशित करताना, जो बायडेन म्हणाले की, या ऐतिहासिक आणि नाजूक क्षणी जागतिक बँकेचा कार्यभार स्वीकारण्यासाठी अजय सर्वात योग्य व्यक्ती आहे. ते पुढं म्हणाले की अजय बंगा यांच्याकडं सध्याच्या दौऱ्यातील हवामान बदलासह सर्व आव्हाने खाजगी आणि सरकारी संसाधनांचा वापर करून हाताळण्याची क्षमता आहे.
गरिबी कमी करण्यासाठी अनुभव उपयोगी पडेल
कोषागार सचिव जेनेट येलेन म्हणाले की, अजय बंगा यांचा अनुभव अत्यंत गरिबी कमी करण्याचे जागतिक बँकेचं उद्दिष्ट साध्य करण्यासाठी अत्यंत उपयुक्त ठरेल. यासोबतच जागतिक बँकेची विश्वासार्हता वाढवण्यातही बंगा महत्त्वाची भूमिका बजावू शकतात. यामध्ये हवामानातील बदलांसोबतच प्रदूषण कमी करण्याच्या महत्त्वाकांक्षी उद्दिष्टांचाही समावेश करण्यात आलाय.
न्यूज अनकट प्रतिनिधी: ईश्वर वाघमारे
