वाढू शकतात पेट्रोलच्या किमती, कच्च्या तेलाच्या किमतीला आग, 7 वर्षात उच्चांक

नवी दिल्ली, 19 जानेवारी 2022: अनेक महिन्यांनंतर किरकोळ कमी झालेले पेट्रोलचे दर पुन्हा वाढू शकतात. कच्च्या तेलाच्या किमतीत लागलेली आग हे त्याचं कारण आहे. इंधनाच्या दराने 7 वर्षांची उच्चांकी पातळी गाठलीय. जाणून घ्या किती वाढू शकतात इंधनाचे दर…

इतक्या वाढल्या कच्च्या तेलाच्या किमती

कच्च्या तेलाचं आंतरराष्ट्रीय मानक असलेल्या ब्रेंट क्रूड ऑइलची किंमत 87 डॉलर प्रति बॅरल (सुमारे 6,490 रुपये प्रति बॅरल) पर्यंत वाढलीय. गेल्या 7 वर्षांतील कच्च्या तेलाची ही सर्वोच्च पातळी आहे. गेल्या काही आठवड्यांपासून कच्च्या तेलाची ही वाढ सातत्यानं दिसून येत आहे.

यामुळंच महागलं कच्चं तेल

पीटीआयच्या वृत्तानुसार, येमेनच्या ज्यू बंडखोरांनी संयुक्त अरब अमिराती (यूएई) येथील तेल कंपनीवर हल्ला केल्यानं पुरवठा विस्कळीत झाला आहे. त्याच वेळी, जागतिक स्तरावर वाढत्या भू-राजकीय तणावामुळंही कच्च्या तेलाच्या किमती वाढण्यास मदत झालीय.

वाढू शकतात पेट्रोलचे दर

आंतरराष्ट्रीय बाजारात कच्च्या तेलाच्या दरात ही झपाट्याने वाढ झाल्यास देशांतर्गत पातळीवरही पेट्रोल आणि डिझेलच्या किमती वाढू शकतात, असं तज्ज्ञांचे मत आहे. कच्च्या तेलाच्या किमती 90 डॉलर वर पोहोचल्यास देशांतर्गत इंधनाच्या किमती 2 ते 3 रुपयांनी वाढू शकतात.

निवडणुकीत दिलासा मिळू शकतो

मात्र, उत्तर प्रदेश आणि पंजाबसह देशातील 5 राज्यांमध्ये विधानसभा निवडणुका होणं बाकी आहे. अशा परिस्थितीत सर्वसामान्यांना या महागड्या पेट्रोलपासून अल्पकाळासाठी दिलासा मिळू शकतो. गेल्या काही दिवसांपासून देशात पेट्रोलचे दर प्रतिलिटर 100 रुपयांच्या वर गेले असले तरी निवडणुका जवळ आल्याने ही वाढ थांबली आहे. गेल्या 74 दिवसांपासून पेट्रोलचे दर कायम आहेत. मंगळवारी दिल्लीत एक लिटर पेट्रोलची किंमत 95.41 रुपये आणि डिझेलची किंमत 86.67 रुपये होती.

न्यूज अनकट प्रतिनिधी: ईश्वर वाघमारे