नवी दिल्ली, ७ सप्टेंबर २०२२: अदानी समूहाची कंपनी अदानी पॉवर या वर्षाच्या शेवटच्या महिन्यापासून बांगलादेशला वीजपुरवठा सुरू करणार आहे. झारखंडमधील गोड्डा जिल्ह्यातील १६०० मेगावॅटच्या थर्मल पॉवर प्लांटमधून कंपनी बांगलादेशला वीज पुरवठा करणार आहे. सध्या बांगलादेशच्या पंतप्रधान शेख हसीना भारत दौऱ्यावर आहेत.
त्यांची भेट घेतल्यानंतर उद्योगपती आणि अदानी समूहाचे अध्यक्ष गौतम अदानी यांनी डिसेंबरपासून वीजपुरवठा सुरू करण्याबाबत बोलले आहे. अदानी पॉवर बांगलादेश पॉवर डेव्हलपमेंट बोर्ड (BPDB) ला ट्रान्समिशन लाइनद्वारे वीज पुरवठा करेल.
१६ डिसेंबरपासून सुरू होणार पुरवठा
गौतम अदानी यांनी बांगलादेशच्या पंतप्रधान शेख हसीना यांची भेट घेऊन सांगितले की त्यांची कंपनी १६ डिसेंबरपर्यंत झारखंडमधील थर्मल पॉवर प्लांटमधून बांगलादेशला वीज पुरवेल. बांगलादेशात १६ डिसेंबर हा विजय दिवस म्हणून साजरा केला जातो. सोमवारी बांगलादेशच्या पंतप्रधान शेख हसीना यांची भेट घेतल्यानंतर अदानी यांनी ट्विट केले, “आम्ही आमचा १६०० मेगावॅटचा गोड्डा वीज प्रकल्प आणि बांगलादेशला १६ डिसेंबर २०२२ रोजी बिजॉय दिबोशला समर्पित ट्रान्समिशन लाइन सुरू करण्यासाठी वचनबद्ध आहोत.”
भारताचा सर्वात मोठा व्यावसायिक भागीदार
भारताच्या ‘नेबरहुड फर्स्ट’ धोरणांतर्गत बांगलादेशला प्रमुख भागीदार म्हणून मान्यता मिळाल्याने हा प्रकल्प महत्त्वाचा आहे. नरेंद्र मोदींच्या सरकारने सर्व शेजारी देशांना व्यापार आणि वाणिज्य, ऊर्जा, वाहतूक आणि कनेक्टिव्हिटी, विज्ञान आणि तंत्रज्ञान, संरक्षण, नद्या आणि सागरी व्यवहारासाठी मदत करण्याचे आश्वासन दिले होते. बांगलादेश हा दक्षिण आशियाई क्षेत्रात भारताचा सर्वात मोठा व्यावसायिक भागीदार आहे. २०१८ ते २०२२ दरम्यान दोन्ही देशांमधील व्यापार ९ अब्ज डॉलर वरून १८ अब्ज डॉलर पर्यंत वाढला आहे.
ट्रान्समिशन लाईनबाबत वाटाघाटी सुरू
बांगलादेशच्या पंतप्रधान शेख हसीना यांनी मंगळवारी पंतप्रधान नरेंद्र मोदी यांची भेट घेतली. त्यानंतर दोन्ही नेत्यांनी संयुक्त पत्रकार परिषद घेतली. पीएम मोदी म्हणाले की, भारत आणि बांगलादेशमधील व्यापार वेगाने वाढत आहे. आम्ही आयटी, अंतराळ आणि आण्विक क्षेत्रात सहकार्य वाढवण्याचा निर्णय घेतला आहे. भारत आणि बांगलादेश यांच्यात वीज पारेषण लाईन्सवर चर्चा सुरू आहे.
न्यूज अनकट प्रतिनिधी: ईश्वर वाघमारे
