गुजरात विजयी; ‘आरसीबी’चा सलग तिसरा पराभव

मुंबई, ९ मार्च २०२३ : अटीतटीच्या लढतीत गुजरातने ‘आरसीबी’चा ११ धावांनी पराभव केला. गुजरातचा हा पहिला विजय ठरला, तर ‘आरसीबी’चा हा सलग तिसरा पराभव ठरला आहे. गुजरातने प्रथम फलंदाजी करताना निर्धारित २० षटकांत २०१ धावांचा डोंगर उभारला होता. प्रत्युत्तरदाखल ‘आरसीबी’चा संघ ६ बाद १९० धावांपर्यंत मजल मारू शकला. ‘आरसीबी’कडून सोफी डिवायन हिने विस्फोटक खेळी केली; पण संघाला विजय मिळवून देण्यात अपयश आले.

गुजरातने दिलेल्या २०२ धावांच्या आव्हानाचा पाठलाग करताना ‘आरसीबी’ला चांगली सुरवात मिळाली होती. स्मृती मंधाना आणि सोफी डिवायन यांनी ५.२ षटकांत ५४ धावांचा पाऊस पाडला होता. स्मृती १८ धावा काढून बाद झाली. त्यानंतर एलिसा पेरी आणि सोफी डिवायन यांनी डाव सावरला; पण मोक्याच्या क्षणी एलिसा पेरी बाद झाली. पेरीने ३२ धावांचे योगदान दिले. एका बाजूला विकेट पडत असताना सोफीने दुसरी बाजू लावून धरली होती. सोफी डिवायन हिने ४५ चेंडूंत ६६ धावांची खेळी केली. त्याशिवाय हेथर नाईट हिने ११ चेंडूंत ३० धावांची खेळी केली; मात्र संघाला विजय मिळवून देण्यात अपयश आले. ठराविक अंतरावर विकेट्स पडल्यामुळे ‘आरसीबी’ला २०२ धावांचा पल्ला पार करता आला नाही. गुजरातकडून अश्ले गार्डनेर हिने सर्वाधिक तीन विकेट घेतल्या.

दरम्यान, महिला आयपीएलमध्ये आज गुजरात संघाने नाणेफेक जिंकून प्रथम फलंदाजी करण्याचा निर्णय घेतला. गुजरातची सलामी फलंदाज सोफिया डंकले हिने विस्फोटक फलंदाजी केली. तिने अवघ्या १८ चेंडूंत अर्धशतक झळकाविले. हे महिला आयपीएलमधील सर्वांत वेगवान अर्धशतक होय. सोफिया डंकले हिच्या विस्फोटक फलंदाजीच्या जोरावर गुजरातने निर्धारित २० षटकांत २०२ धावांचा डोंगर उभारला.

२३२ च्या स्ट्राईक रेटने पाडला धावांचा पाऊस
सोफियाने प्रथम फलंदाजी करताना २८ चेंडूंत ११ चौकार आणि तीन षटकारांच्या मदतीने ६५ धावांचा पाऊस पाडला. सोफियाने अवघ्या १८ चेंडूंत अर्धशतक झळकाविले होते. सोफियाने या डावात २३२ च्या स्ट्राईक रेटने धावा चोपल्या. याआधीच्या दोन सामन्यांत सोफियाची बॅट शांत होती; पण आज ‘आरसीबी’विरोधात सोफियाने धावांचा पाऊस पाडला.

‘न्यूज अनकट’ प्रतिनिधी : सतीश पाटील