भारतीय वंशाची व्यक्ती बनणार सिंगापूरची राष्ट्राध्यक्ष ?

सिंगापूर, ११ जुलै २०२३ : जगभरात अनेक देशांच्या उच्च पदांवर भारतीय वंशाच्या व्यक्ती आहेत. आता सिंगापूरमधील भारतीय वंशाचे जेष्ठ मंत्री थरमन षण्मुगरत्नम तेथील राष्ट्राध्यक्षपदाची निवडणूक लढवणार आहेत. ही निवडणूक लढविण्यासाठी त्यांनी सर्व अधिकृत आणि राजकीय पदांचा राजीनामा दिला आहे. संसदीय कामकाजाच्या शेवटच्या दिवशी खासदारांनी षण्मुगरत्नम यांचा सत्कार केला आणि दोन दशकांहून अधिक काळ सार्वजनिक सेवेतील त्यांच्या योगदानाची स्तुती केली‌.

६६ वर्षांचे थरमन षण्मुगरत्नम हे सिंगापूर सरकारमध्ये सामाजिक धोरणाचे समन्वयक मंत्री होते. राष्ट्रध्यक्षपदाच्या निवडणूकीसाठी ते पीपल्स अॅक्शन पार्टीचा राजीनामा देणार आहेत. मंत्री म्हणून गुरुवारी त्यांनी संसदेतील शेवटची बैठक घेतली. आम्हाला या सभागृहात थरमन यांची आठवण येईल असे सभागृह नेत्या इंद्राणी राजा म्हणाल्या.

पुढे बोलताना त्या म्हणाल्या, त्यांची उपस्थिती प्रभावी होतीच पण त्यांची भाषणेही अभ्यासपूर्ण होती. यांचा सर्वांत मोठा गुण म्हणजे ते गुंतागुंतीची आर्थिक तत्वे अगदी सोप्या पद्धतीने मांडायचे, त्यांची बुद्धीमत्ता आणि वक्तृत्वाची आम्हाला आठवण येईल, एक महत्त्वाचे म्हणजे एक मित्र आणि सहकारी खासदार म्हणून आम्हाला त्यांची उणीव भासेल.

न्युज अनकट प्रतिनिधी : अमोल बारवकर