भारताच्या निखत जरीनने रचला इतिहास, वर्ल्ड बॉक्सिंग चॅम्पियनशिपमध्ये जिंकले सुवर्ण

Nikhat Zareen World Boxing Championship, 20 मे 2022: भारताच्या निखत जरीनने जागतिक बॉक्सिंग चॅम्पियनशिपमध्ये इतिहास रचला आहे. गुरुवारी झालेल्या अंतिम सामन्यात निखत जरीनने सुवर्णपदक पटकावले. 52 किलो गटात निखत जरीनने थायलंडच्या जितपॉन्ग जुटामासचा 5-0 असा पराभव करून विजय मिळवला.

संपूर्ण लढतीत निखत जरीनचा दबदबा दिसून आला, तिने प्रतिस्पर्धी बॉक्सरवर उजव्या हाताचा जबर मारून आपल्या चढाओढीला सुरुवात केली. शेवटच्या चार फेऱ्यांमध्ये सर्व न्यायाधीशांनी तिच्या बाजूने निकाल देऊन पहिला उपांत्य सामना 5-0 ने जिंकून निखत जरीनने स्पर्धेवर वर्चस्व राखले. आता अंतिम फेरीतही तेच वर्चस्व पाहायला मिळाले.

निखत जरीनने गेल्या काही दिवसांत सातत्याने चांगली कामगिरी केली आहे. निखत जरीनने 2019 आशियाई चॅम्पियनशिपमध्ये कांस्यपदकही जिंकले. तर याच स्पर्धेच्या उपांत्य फेरीच्या सामन्यात तिने ब्राझीलच्या कॅरोलिन डी आल्मेडा हिचा 5-0 असा पराभव केला.

25 वर्षीय निखत जरीन ही जागतिक बॉक्सिंग चॅम्पियनशिपमध्ये सुवर्णपदक जिंकणारी पाचवी भारतीय महिला बॉक्सर आहे. बॉक्सिंग लिजेंड मेरी कोमने या चॅम्पियनशिपमध्ये 6 वेळा सुवर्णपदक जिंकून विक्रम केला आहे. भारताकडून एमसी मेरी कोम, सरिता देवी, जेनी आरएल आणि लेखा सी. यांनी जागतिक बॉक्सिंग चॅम्पियनशिपमध्ये सुवर्णपदके जिंकली आहेत. आता या यादीत युवा बॉक्सर निखत जरीनचेही नाव जोडले गेले आहे.

निखत जरीनने अलीकडेच स्ट्रॅन्डजा मेमोरिअल येथे पदक जिंकले आणि येथे दोन सुवर्णपदके जिंकणारी ती पहिली भारतीय ठरली. येथे तिने टोकियो ऑलिम्पिकच्या रौप्यपदक विजेत्याला पराभूत केले, आता विश्वविजेती बनल्यानंतर निखत जरीनकडून अपेक्षा वाढल्या आहेत. अशा स्थितीत आता नजर थेट पॅरिस ऑलिम्पिकवर खिळली आहे.

न्यूज अनकट प्रतिनिधी: ईश्वर वाघमारे