नवी दिल्ली, १८ नोव्हेंबर २०२०: कोरोनामुळे यंदा खेळाडूंची चांगलीच निराशा झाली आहे. अनेक आंतरराष्ट्रीय स्तरावरील स्पर्धा यामुळं पुढं ढकलण्यात आल्या आहेत. याबाबत आणखीन एक निराशाजनक बातमी समोर आली आहे. कोरोनाच्या जीवघेण्या संसर्गामुळं फुटबॉलचं संचालन करणारी संस्था फिफा’नं भारतातला ‘अंडर-१७ महिला वर्ल्ड कप’ रद्द केलाय. भारतात यापूर्वी हा वर्ल्ड कप यावर्षी नोव्हेंबरमध्ये होणार होता पण कोरोनाच्या धोक्यामुळं पुढच्या वर्षी (२०२१) फेब्रुवारी-मार्चमध्ये सामना ढकलण्यात आला. पण संसर्गाचा फैलाव पाहता आता तो थेट २०२२ मध्ये आयोजित करण्यात येणार आहे.
फिफा समितीकडून हा निर्णय घेण्यात आला आहे. फिफा-कॉन्फेडरेशन कोरोनाच्या धोक्यासंबंधी सर्व संस्थेशी चर्चा केली आणि त्यांनंतर हा निर्णय घेण्यात आलाय. कोरोनाच्या वाढत्या धोक्यामुळं अंडर-१७ महिला आणि अंडर-२० महिला वर्ल्ड कप असे दोन्ही सामने पुढच्या वर्षासाठी रद्द करण्यात आले असून २०२२ मध्ये या सामन्यांचं आयोजन करण्यात येईल असं सांगण्यात आलं आहे.
कोरोनामुळं अनेक स्पर्धांवर मोठा परिणाम झालाय. कन्फेडरेशन्स ऑफ आफ्रिका, उत्तर आणि मध्य अमेरिका आणि कन्फेडरेशन्स ऑफ दक्षिण अमेरिकेनंही पात्रता (क्वालिफाइंग) फेरी घेतल्या नाहीत. तसंच युरोपनंही त्यांची पात्रता फेरी रद्द केलीय. यामध्ये स्पेन, इंग्लंड आणि जर्मनी यांचाही समावेश आहे.
न्यूज अनकट प्रतिनिधी: ईश्वर वाघमारे
