आयपीएल २०२० – कोलकाता नाईट रायडर्स संघाचा राजस्थान रॉयल्स संघावर ३७ धावांनी विजय

दुबई, १ ऑक्टोंबर २०२०: आयपीएल २०२० मध्ये काल झालेल्या १२ व्या सामन्यात राजस्थान रॉयल्स विरुद्ध कोलकाता नाईट रायडर्स या सामन्यात कोलकाता नाईट रायडर्स संघाने ३७ धावांनी दणदणीत विजय मिळवला आहे.

कोलकाता नाईट रायडर्सच्या संघाने दिलेलं आव्हान गाठण्यासाठी मैदानात उतरलेल्या राजस्थान रॉयल्स संघाला २० ओव्हर्समध्ये ९ विकेट्स गमावत फक्त १३७ रन्स करता आल्या, यामुळे कोलकाताने ३७ धावांनी विजय मिळवला आहे. दुबई इंटरनॅशनल क्रिकेट स्टेडियममध्ये ही मॅच झाली. कोलकाता नाईट रायडर्सकडून शिवम मावी, कमलेश नागरकोट्टी आणि वरुण चक्रवर्ती यांनी प्रत्येकी दोन-दोन विकेट्स घेतल्या. तर सुनील नरेन, पॅट कमिन्स, कुलदीप यादव यांनी प्रत्येकी एक-एक विकेट घेतली. कोलकाताच्या बॉलर्सने केलेल्या कामगिरीमुळे राजस्थान रॉयल्सच्या संघाला २० ओव्हर्समध्ये १३७ धावा करता आल्या. परिणामी कोलकाता नाईट रायडर्सचा विजय झाला.

कोलकाता नाईट रायडर्सने राजस्थान रॉयल्सला पराभूत केले आहे. यामुळे पॉईंट्स टेबलमध्ये अव्वल असलेली राजस्थान रॉयल्सची टीम आता तिसऱ्या क्रमांकावर पोहोचली आहे. कोलकाता नाईट रायडर्सची टीम दुसऱ्या क्रमांकावर दाखल झाली आहे. तर पहिल्या स्थानावर दिल्ली कॅपिटल्सची टीम पोहोचली आहे.

न्यूज अनकट प्रतिनिधी : अंकुश ढावरे