नवीन वर्षाच्या पहिल्याच दिवशी एलपीजी सिलिंडरच्या किमतीत वाढ…

नवी दिल्ली, १ जानेवारी २०२१: तेल विपणन कंपन्यांनी नवीन वर्षाच्या पहिल्या दिवशी एलपीजी गॅस सिलिंडरच्या किंमतीत वाढ केली आहे. गेल्या महिन्यातही गॅस सिलिंडरच्या किंमतीत सुमारे १०० रुपयांची वाढ करण्यात आली होती.

तथापि, १ जानेवारीला म्हणजेच आज व्यावसायिक सिलिंडर्सच्या किंमतीत ही वाढ करण्यात आली आहे. घरगुती एलपीजी सिलिंडर्समध्ये आज कोणतीही वाढ झालेली नाही. गेल्या महिन्यात घरगुती एलपीजी सिलिंडर्सच्या किंमतीत सुमारे १०० रुपयांची वाढ करण्यात आली आहे.

किती वाढली किंमत

इंडियन ऑईलनुसार १ जानेवारीपासून दिल्लीत १९ किलो व्यावसायिक गॅस सिलिंडर्सची किंमत १३४९ रुपयांवर गेली आहे. यापूर्वी १५ डिसेंबर रोजी ही किंमत १३३२ रुपये होती. म्हणजेच, प्रति सिलिंडरमध्ये १७ रुपयांची वाढ आहे. वाणिज्यिक सिलिंडर्सची किंमत कोलकाता येथे १४१० रुपये, चेन्नईमध्ये १४६३.५० रुपये आणि मुंबईमध्ये १२८०.५० रुपये आहे.

गेल्या महिन्यातही गॅसच्या किंमतीत वाढ करण्यात आली होती

गेल्या महिन्यात गॅस सिलिंडर्सच्या किंमतीत लक्षणीय वाढ झाली होती. घरगुती एलपीजीच्या किंमतीत दोनदा सुमारे १०० रुपयांची वाढ झाली, त्यानंतर दिल्लीत १४.२ किलो विना अनुदानित एलपीजी सिलिंडर आता ६९४ रुपये झाला आहे. ५ किलो छोट्या सिलिंडरच्या किंमतीत १८ रुपयांची वाढ करण्यात आली आहे.

१९ किलो वाणिज्यिक सिलिंडरच्या किंमतीत ३६.५० रुपयांची वाढ झाली. तेल कंपन्या दरमहा एलपीजी सिलिंडरच्या किंमतींचा आढावा घेतात. प्रत्येक राज्यात कर वेगवेगळा असतो आणि त्यानुसार एलपीजीच्या किंमती वेगवेगळ्या असतात.

न्यूज अनकट प्रतिनिधी: ईश्वर वाघमारे