Pimpri-Chinchwad Police Transfer: पिंपरी-चिंचवड पोलीस आयुक्तालयात प्रशासकीय सोयीसाठी तीन अनुभवी पोलीस उपायुक्तांच्या जबाबदाऱ्यांमध्ये महत्त्वपूर्ण बदल करण्यात आले आहेत. पोलीस आयुक्त विनयकुमार चौबे यांनी सोमवारी याबाबतचे आदेश जारी केले, ज्यामुळे पोलीस दलात उत्साहाचे वातावरण निर्माण झाले आहे.
या बदल्यांनुसार, विवेक पाटील यांची मुख्यालय उपायुक्त पदावरून वाहतूक शाखेच्या उपायुक्तपदी नियुक्ती करण्यात आली आहे. त्यांच्या जागी बापू बांगर यांची वाहतूक शाखेतून परिमंडळ तीनचे पोलीस उपायुक्त म्हणून बदली झाली आहे. विशेष म्हणजे, परिमंडळ तीनचे पोलीस उपायुक्त डॉ. शिवाजी पवार यांना आता गुन्हे शाखेची महत्त्वाची जबाबदारी सोपवण्यात आली आहे. याव्यतिरिक्त, विशेष शाखेचा अतिरिक्त कार्यभारही त्यांच्याकडेच राहणार आहे.
गेल्या आठवड्यात राज्यातील पोलीस उपायुक्तांच्या झालेल्या बदल्यांमध्ये पिंपरी-चिंचवड गुन्हे शाखेचे उपायुक्त संदीप डोईफोडे यांची मीरा भाईंदर-वसई-विरार येथे बदली झाली होती. तसेच, परिमंडळ-१ च्या पोलीस उपायुक्त स्वप्ना गोरे यांची पुणे येथील राज्य राखीव पोलीस बल, गट क्रमांक २ येथे समादेशक म्हणून बदली झाली. या दोन अधिकाऱ्यांच्या बदलीमुळे रिक्त झालेल्या जागांवर आता श्वेता खेडकर (नागपूर शहर आयुक्तालयातील विशेष शाखा) आणि संदीप आटोळे (छत्रपती संभाजीनगर येथील लाचलुचपत प्रतिबंधक विभाग) या दोन नवीन उपायुक्तांची पिंपरी-चिंचवड पोलीस आयुक्तालयात नियुक्ती झाली आहे. या बदलांमुळे पोलीस दलाच्या कार्यक्षमतेत आणखी वाढ होईल अशी अपेक्षा आहे.
न्यूज अनकट प्रतिनिधी, सोनाली तांबे
