माणगाव: बस दापोली डेपोची आहे व मुंबईतील परळ डेपो येथून ही बस दापोलीला जात होती. बसमध्ये एकूण ४४ प्रवासी होते, असे एसटीकडून सांगण्यात आले आहे. मुंबईहून ही बस दापोलीकडे जात असतानाच पहाटे साडेपाच वाजताच्या सुमारास हा अपघात झाला. चालकाचे नियंत्रण सुटल्याने भरधाव बस पुलाचा कठडा तोडून पुलावरून खाली कोसळली. अपघातात किमान २० प्रवासी जखमी झाले असून सर्व जखमींना तातडीने माणगाव येथील उपजिल्हा रुग्णालयात दाखल करण्यात आले आहे.
मुंबई-गोवा राष्ट्रीय महामार्गावर माणगावपासून जवळच असलेल्या कळमजे गावातील पुलावरून ही एसटी बस खाली कोसळली. दोन जखमी प्रवाशांची प्रकृती चिंताजनक असल्याची माहिती मिळाली आहे. या बसचा क्रमांक एमएच १४-बीटी-०४१३ असा आहे. मिळालेल्या माहितीनुसार, कळमजे पूल १०० वर्षे जुना असून पुलाचा कठडा कमकुवत होता का, याचाही तपास केला जात आहे.
