मोदींची पुतिन यांच्याशी दुसऱ्यांदा चर्चा, पुतिन यांनी भारतीयांना बाहेर काढण्यासाठी मदत करण्याचे दिले आश्वासन

Russia-Ukraine War, 3 मार्च 2022: पंतप्रधान नरेंद्र मोदी यांनी रशियाचे राष्ट्राध्यक्ष व्लादिमीर पुतीन यांच्याशी चर्चा केली. रशिया-युक्रेन युद्धाच्या पार्श्‍वभूमीवर पंतप्रधान मोदींनी रशियाचे राष्ट्राध्यक्ष व्लादिमीर पुतिन यांच्याशी दुसऱ्यांदा संवाद साधला आहे. युक्रेनमध्ये अडकलेल्या भारतीयांच्या सुरक्षित परतीसाठी सहकार्य करण्याचे आश्वासन रशियाचे अध्यक्ष पुतीन यांनी पंतप्रधान मोदींना दिले आहे.

खार्किवमध्ये अडकलेल्या भारतीय विद्यार्थ्यांबद्दल पीएम मोदींनी पुतीन यांच्याशी चर्चा केली आहे. रशियाने खार्किव ताब्यात घेतल्याचा दावा केला आहे. खार्किवमध्ये अजूनही मोठ्या संख्येने भारतीय विद्यार्थी अडकले आहेत. भारतीय विद्यार्थ्यांच्या सुरक्षित परतीसाठी रशियन सैन्य आवश्यक ती सर्व पावले उचलत असल्याचे पुतीन यांनी म्हटले आहे.

त्यांनी असेही म्हटले आहे की, आम्ही तेथून भारतीय विद्यार्थ्यांच्या एका टीमला विशेष कॉरिडॉरद्वारे रशिया मध्ये ताबडतोब बाहेर काढण्याचा प्रयत्न करू जेणेकरून त्यांना लवकर आणि सुरक्षितपणे भारतात परत पाठवता येईल. पंतप्रधान मोदी आणि रशियाचे अध्यक्ष पुतिन यांच्यात झालेल्या चर्चेनंतर रशियाच्या संरक्षण मंत्रालयाने युक्रेन सरकारवर भारतीय विद्यार्थ्यांना ओलीस ठेवल्याचा आरोप केला आहे.

रशियन रणगाड्यांना रोखण्यासाठी युक्रेनकडून भारतीय विद्यार्थ्यांचा वापर केला जात असल्याचा दावा रशियन संरक्षण मंत्रालयाने केला आहे. विशेष म्हणजे पंतप्रधान मोदी आणि रशियाचे अध्यक्ष व्लादिमीर पुतिन यांच्यात युक्रेन युद्धाची ही दुसरी वेळ आहे, जेव्हा चर्चा झाली. युद्धादरम्यान पंतप्रधान मोदी पुतीन यांच्याशी पहिल्यांदा बोलले तेव्हा त्यांनी युक्रेनमध्ये अडकलेल्या भारतीय विद्यार्थ्यांना सुरक्षितपणे बाहेर काढण्याचा आग्रह धरला होता.

यावेळी रशियाचे अध्यक्ष पुतिन यांच्याशी झालेल्या संभाषणात पंतप्रधान मोदींनी युक्रेनमध्ये अडकलेल्या भारतीय विद्यार्थ्यांच्या सुरक्षित परतण्याबाबतही चर्चा केली. पहिल्यांदाच पीएम मोदी आणि रशियाच्या राष्ट्राध्यक्षांमध्ये सुमारे 25 मिनिटे चर्चा झाली. त्यानंतर रशियाच्या राष्ट्राध्यक्षांनी पंतप्रधान मोदींना युक्रेनमधील ताज्या परिस्थितीची माहिती दिली.

17 हजार भारतीय विद्यार्थ्यांना युक्रेनमधून बाहेर काढण्यात आले

विशेष म्हणजे, ऑपरेशन गंगा अंतर्गत, भारत सरकार युद्धात अडकलेल्या भारतीय विद्यार्थ्यांना बाहेर काढण्याच्या कवायतीत गुंतले आहे. त्याचबरोबर परराष्ट्र मंत्रालयाकडून सांगण्यात आले की, भारत सरकारने आतापर्यंत १७ हजार भारतीय विद्यार्थ्यांना युक्रेनमधून परत आणले आहे. युक्रेनमध्ये अडकलेल्या इतर विद्यार्थ्यांनाही लवकरच मायदेशी आणले जाईल, असा दावा परराष्ट्र मंत्रालयाने केला आहे.

बुखारेस्ट, बुडापेस्ट आणि पोलंड येथून देखील उड्डाणे

यापूर्वी, परराष्ट्र व्यवहार मंत्रालयाच्या प्रवक्त्याने पत्रकार परिषदेत सांगितले होते की बुखारेस्ट येथून एक विमान आज रात्री दिल्लीला पोहोचेल. याशिवाय बुखारेस्ट, बुडापेस्ट आणि पोलंड येथूनही उड्डाणे येणार आहेत. परराष्ट्र मंत्रालयाने खार्कीव सोडण्याबाबत सूचना जारी केल्यानंतर काही विद्यार्थी खार्किव सोडण्यात यशस्वी झाल्याचे बागची यांनी सांगितले.

न्यूज अनकट प्रतिनिधी: ईश्वर वाघमारे