एमएस धोनीची ड्रोन कंपनीत गुंतवणूक, नुकतेच पंतप्रधान मोदींनी म्हटलं होतं ‘ड्रोन ही फ्यूचर इंडस्ट्रीज!

नवी दिल्ली, 7 जून 2022: ड्रोनचा व्यवसाय भारतात झपाट्यानं पसरणार आहे. अलीकडंच दिल्लीत ड्रोन फेस्टिव्हलचं आयोजन करण्यात आलं होतं. या महोत्सवाचं उद्घाटन पंतप्रधान नरेंद्र मोदी यांच्या हस्ते झालं. ड्रोन घरोघरी घेऊन जाण्याचा रोडमॅप त्यांनी सांगितला होता, विशेषतः ड्रोन शेतकर्‍यांसाठी कसा उपयुक्त ठरणार आहे हे त्यांनी पटवून दिलं.

धोनीने केली गरुड एरोस्पेसमध्ये गुंतवणूक

आता असं वृत्त आहे की देशातील ड्रोन उद्योगांचा भारतीय संघाचा माजी कर्णधार महेंद्रसिंग धोनीवर प्रभाव पडलाय. महेंद्रसिंग धोनी (MS dhoni) यांनी चेन्नईस्थित भारतीय ड्रोन स्टार्टअप गरुडा एरोस्पेसमध्ये गुंतवणूक केलीय. यासोबतच त्यांची ब्रँड ॲम्बेसिडर म्हणूनही नियुक्ती करण्यात आलीय.

याशिवाय गरुड एरोस्पेस हे सेलिब्रिटी ब्रँड अॅम्बेसेडर असणारे पहिले ड्रोन स्टार्टअप आहे. मात्र, या कराराबद्दल फारशी माहिती उपलब्ध झालेली नाही. त्याने किती गुंतवणूक केली याचा खुलासा करण्यात आलेला नाही.

गरुड एरोस्पेसमध्ये सहभागी झाल्याने धोनी खूश

ड्रोन कंपनीने सोमवारी जारी केलेल्या निवेदनात धोनीने म्हटलंय की, “गरुड एरोस्पेसचा भाग बनून मला आनंद होत आहे आणि त्यांनी ऑफर केलेल्या अनोख्या ड्रोन सोल्यूशन्ससह त्यांच्या वाढीची कथा पाहण्यास मी उत्सुक आहे.”

देशातील 26 शहरांमध्ये कार्यरत 300 ड्रोन आणि 500 ​​पायलटसह सुसज्ज, गरुड एरोस्पेस ड्रोन-निर्मिती सुविधा अलीकडेच पंतप्रधान मोदींच्या हस्ते लॉन्च करण्यात आली. याआधी क्रिकेटर धोनी अनेक व्यवसायांशी जोडला गेला आहे. धोनी कपडे, दारू आणि शेती यासारख्या उद्योगांशी संबंधित आहे. शेती डोळ्यासमोर ठेवून धोनीने आता ड्रोन कंपनीत गुंतवणूक करण्याचा निर्णय घेतलाय.

पंतप्रधान मोदींनी गुंतवणुकीचे आवाहन केलं

हे लक्षात घेण्यासारखं आहे की गेल्या आठवड्यात पीएम मोदींनी ड्रोन फेस्टिव्हलमध्ये म्हटलं होतं की मला आशा आहे की भविष्यात ड्रोनचा वापर वेगानं वाढेल. मी देशभरातील आणि जगभरातील गुंतवणूकदारांना पुन्हा आमंत्रित करत आहे. मी इंडस्ट्री, तज्ज्ञांनाही आवाहन करत आहे की, लोकांपर्यंत ड्रोन अधिक सुलभ व्हावेत. मी तरुणांना आवाहन करू इच्छितो की नवीन ड्रोन स्टार्टअप्सनी पुढं यावं.

अदानी-अंबानींनीही गुंतवणूक केली
देशातील दिग्गज उद्योगपतींचाही ड्रोन व्यवसायावर डोळा आहे. Adani Enterprises Limited (AEL) ची उपकंपनी असलेल्या Adani Defence Systems and Technologies Limited ने 27 मे 2022 रोजी कृषी ड्रोन स्टार्टअप जनरल एरोनॉटिक्स मधील 50% हिस्सा विकत घेतलाय. अदानी एंटरप्रायझेसच्या मते, ही अधिग्रहण प्रक्रिया 31 जुलै 2022 पर्यंत पूर्ण केली जाईल. दुसरीकडं रिलायन्स इंडस्ट्रीजच्या मुकेश अंबानींची कंपनी जिओ प्लॅटफॉर्मच्या दोन उपकंपन्याही ड्रोन बनवत आहेत.

न्यूज अनकट प्रतिनिधी: ईश्वर वाघमारे