First batch of women cadets at NDA: पुण्यातील राष्ट्रीय संरक्षण प्रबोधिनी (NDA) च्या ऐतिहासिक १४८ व्या तुकडीच्या ‘पासिंग आउट परेड’ (POP) च्या आधी, एनडीए एक्सपो स्प्रिंग टर्म २०२५ चे मंगळवारी २७ मे रोजी उद्घाटन झाले. एनडीएच्या फॅमिली वेल्फेअर ऑर्गनायझेशनच्या अध्यक्षा कमलजीत सिंग यांच्या हस्ते झालेल्या या प्रदर्शनात, अकादमीतील कॅडेट्सच्या विविध हॉबी क्लबचे उपक्रम आणि कलाकृती प्रदर्शित करण्यात आल्या. या प्रदर्शनात २४ इनडोअर आणि आउटडोअर हॉबी क्लबचे प्रकल्प पाहायला मिळाले, ज्यात सांकेतिक भाषा समजून घेणारा मानवी रोबोट, अडथळे टाळणारी प्रणाली, क्वाड-कॉप्टर ड्रोन, पाण्याखालील अल्ट्रासोनिक वस्तू शोधक यंत्रणा आणि कॅडेट्सनी सादर केलेले रॅपलिंगचे थेट प्रात्यक्षिक हे विशेष आकर्षण ठरले.
कमलजीत सिंग यांनी कॅडेट्सच्या उत्साहाचे आणि कौशल्याचे कौतुक केले, तसेच प्रशिक्षकांनी त्यांची प्रतिभा आणि चिकित्सक विचार विकसित करण्यासाठी घेतलेल्या प्रयत्नांचेही अभिनंदन केले. हे प्रदर्शन गुरुवारपर्यंत (२९ मे) लोकांसाठी खुले राहणार असून, ‘पास आउट’ होणाऱ्या १४८ व्या तुकडीतील कॅडेट्सच्या पालकांना आपल्या पाल्यांनी अभ्यासक्रमाव्यतिरिक्त केलेल्या सर्जनशील कार्याचे कौतुक करण्याची संधी मिळेल. हा त्यांच्यासाठी एक अभिमानाचा क्षण असेल.
दरम्यान, एनडीएच्या १४८ व्या तुकडीची ‘पासिंग आउट परेड’ ३० मे रोजी होणार असून, लष्कराचे माजी प्रमुख आणि मिझोरामचे राज्यपाल, जनरल विजय कुमार सिंग (निवृत्त) हे या सोहळ्याचे ‘रिव्ह्यूइंग ऑफिसर’ असतील. या तुकडीतून पहिल्यांदाच महिला कॅडेट्सही उत्तीर्ण होणार आहेत, जो एक ऐतिहासिक क्षण आहे. २९ मे रोजी होणाऱ्या दीक्षांत समारंभासाठी दीनदयाल उपाध्याय विद्यापीठाच्या कुलगुरू प्रोफेसर डॉ. पूनम टंडन प्रमुख पाहुण्या म्हणून उपस्थित राहतील
न्यूज अनकट प्रतिनिधी, साक्षी पांचाळ
 च्या ऐतिहासिक १४८ व्या तुकडीच्या 'पासिंग आउट परेड' (POP) च्या आधी, एनडीए एक्सपो स्प्रिंग टर्मचे उद्घाटन झाले.){kind=link}