चीनला खुश करण्यासाठी पाकिस्तान आपल्याच लोकांची करत आहे फसवणूक

इस्लामाबाद, ७ नोव्हेंबर २०२०: पाकिस्तानमध्ये चिनी गुंतवणूकीबाबत आधीच चिंता व्यक्त केली जात होती. चीनच्या गुंतवणूकीमुळी स्थानिक लोकांच्या नोकर्‍या निर्माण होतील आणि त्यांना त्याचा फायदा होईल, असा पाकिस्तान सरकार दावा करीत आहे. तथापि, या दाव्याचं वास्तव आत्तापासूनच दिसण्यास सुरुवात झाली आहे. पाकिस्तानी वृत्तपत्र द न्यूज इंटरनॅशनलच्या वृत्तानुसार, पाकिस्ताननं चीनच्या सहाय्यानं सुरू केलेल्या मेट्रोमध्ये पाकिस्तान मधील नागरिक आणि चीनमधील नागरीक या दोन्ही कर्मचाऱ्यांचा समावेश आहे. तथापि, या अहवालानुसार स्थानिक कर्मचाऱ्यांपेक्षा चिनी कर्मचाऱ्यांना वेतन जास्त दिलं जात आहे.

आपल्याच देशात होत असलेल्या या भेदभावामुळं पाकिस्तानी कर्मचार्‍यांचं मनोबल कमी होत आहे. तर चिनी कर्मचाऱ्यांना युआनमध्ये पगार दिला जात आहे, तर स्थानिक लोकांना फक्त पाकिस्तानी रुपयातच पगार देण्यात येत आहे. सहाजिकच पाकिस्तान रुपये आणि चिनी करन्सी यामध्ये करन्सी व्हॅल्यू चा फार मोठा फरक आहे.

द न्यूजच्या वृत्तानुसार, बुधवारी एका चिनी युआनची किंमत २४ पाकिस्तानी रुपयांच्या समतुल्य होती. ऑरेंज लाइन मेट्रो ट्रेन प्रकल्पाशी संबंधित ९३ चिनी कर्मचार्‍यांच्या पगाराच्या आकडेवारीचा अभ्यास केल्यानंतर असं दिसून आलं आहे की, त्यांना जास्त पगार देण्यात येत आहेत. जर आपण त्याच पदावर कार्यरत असलेल्या पाकिस्तानी कर्मचारी आणि चिनी कर्मचार्‍यांची तुलना केली तर पाकिस्तानी लोकांना काहीही मिळत नाही. एका आकडेवारीनुसार, दरमहा १,३६,००० युआन चीनी मूळचे उपमुख्य कार्यकारी अधिकारी / सीएफओ / संचालक (ग्रेड २) यांना दिले जात आहेत, जे सुमारे ३२ लाख पाकिस्तानी रुपये आहेत. या ग्रेडमध्ये तीन पदे होती आणि या तिन्ही पदांवर चिनी नागरिकांची नेमणूक करण्यात आली होती. या पदावर कोणत्याही पाकिस्तानी कर्मचाऱ्याची नेमणूक केलेली नाही.

डीजीएम रँकच्या चिनी अधिकाऱ्यांना दरमहा ८३,००० युआन दिले जात आहेत, जे १९ लाखांच्या बरोबरीचे आहेत. उमर चिश्ती या पाकिस्तानी अधिकाऱ्यास डीजीएम उपकरण व देखभाल दुरुस्तीसाठी पोस्ट केले आहे, तर त्यांना फक्त ६,२५,००० रुपये मिळतात. द न्यूजच्या अहवालानुसार मेट्रोमध्ये तंत्रज्ञ / ट्रेन ऑपरेटर आणि इतर पदांवर तैनात असलेल्या ४३ चीनी लोकांना मूळ ४७,५०० युआन म्हणजे ११ लाख रुपये मानधन दिलं जात आहे. मात्र, पाकिस्तानी ट्रेन ऑपरेटर किंवा ट्रेनच्या क्रूला केवळ ६०,००० रुपये मिळतात.

पगाराच्या या भेदभावाचं आणखी एक उदाहरण देताना या वृत्तानुसार, चिनी वंशाचे १२ लोक ट्रेन डिस्पॅचर आणि रेल्वे चालक दल यांच्या पदावर काम करत आहेत, ज्यांना दरमहा ५७,००० युआन (१३ लाख) वेतन दिलं जात आहे. तर या पदांवर तैनात पाकिस्तानी लोकांना फारच कमी पगार मिळत आहेत.

त्यांच्या चिनी सहकारी कर्मचाऱ्यांचा पगार पाहता पाकिस्तानी कर्मचार्‍यांनीही सरकारकडून पगार वाढवण्याची मागणी केली आहे. त्याच वेळी पंजाब मास ट्रान्झिट अथॉरिटीचे सरव्यवस्थापक उज्जार शहा म्हणाले की, जर पाकिस्तानी कर्मचारी पाकिस्तानी लोकांशी तुलना करतात तर त्यांचे मनोबल कमी होणार नाही. ते म्हणाले की, पाकिस्तानी कर्मचारी आणि चिनी कर्मचार्‍यांच्या पगाराची अजिबात तुलना करता येणार नाही.

न्यूज अनकट प्रतिनिधी: ईश्वर वाघमारे