पंजाब प्रांतात पाकिस्तानचे विमान कोसळले; दोन ठार

पंजाब (वृत्तसंस्था) : पाकिस्तानमधील पंजाब प्रांतात पाकिस्तान एअर फोर्स (पीएएफ) चे एक लढाऊ विमान कोसळून झालेल्या अपघातात विमानातील दोन्ही पायलट ठार झाल्याची माहिती समोर येत आहे.
नियमित ऑपरेशनल ट्रेनिंग मिशनवरील हे विमान लाहोरपासून सुमारे ३०० किलोमीटर अंतरावर असलेल्या मियांवलीजवळ दुर्घटनाग्रस्त झाले आहे, असे पीएएफने प्रसिद्धीस दिलेल्या पत्रकात म्हटले आहे. पंतप्रधान इम्रान खान यांचे मूळ शहर असलेल्या मियांवलीमधील एका मोकळ्या ठिकाणी हे विमान कोसळले असल्याची माहिती समोर आली आहे.
हवाई दलाच्या मुख्यालयाने अपघाताचे कारण निश्‍चित करण्याचे आदेश दिले आहेत. बचाव दल घटनास्थळी दाखल झाले असून आणि त्यांनी मृतदेह लष्करी रुग्णालयात हलवले. बचाव पथकातील कर्मचाऱ्यांनी या परिसराची नाकाबंदी केली आहे. घटनास्थळी जाण्यास बंदी घालण्यात आली आहे.