पंत-हार्दिकच्या धमाक्याने टीम इंडियाचा शानदार विजय, 2-1 ने जिंकली वनडे मालिका

IND vs ENG 3rd ODI, १८ जुलै २०२२: टीम इंडियाने रविवारी (१७ जुलै) इंग्लंडविरुद्ध खेळल्या गेलेल्या तिसर्‍या एकदिवसीय सामन्यात शानदार विजय मिळवला आहे. मँचेस्टरमध्ये खेळल्या गेलेल्या या सामन्यात टीम इंडियाला विजयासाठी २६० धावांचे लक्ष्य मिळाले होते, जे भारतीय संघाने पाच गडी गमावून पूर्ण केले. या विजयासह भारताने वनडे मालिका २-१ अशी खिशात घातली आहे.

भारतीय संघाच्या विजयात ऋषभ पंत आणि हार्दिक पंड्या हिरो म्हणून उदयास आले. पंतने १२५ धावांची शानदार खेळी खेळली. त्याचवेळी पंड्याने अष्टपैलू कामगिरी केली. ऋषभ पंतला सामनावीर आणि हार्दिक पांड्याला अष्टपैलू खेळ दाखविल्याबद्दल मालिकेतील सर्वोत्तम खेळाडू म्हणून गौरवण्यात आले.

इंग्लंड – २५९/१० (४५.५ षटके)
भारत – २६१/५ (४२.१ षटके)

भारताची टॉप ऑर्डर झाली होती उद्ध्वस्त

दुसऱ्या सामन्याप्रमाणे या सामन्यातही भारतीय संघाची आघाडीची फळी फ्लॉप ठरली. शिखर धवन पॅव्हेलियन मध्ये जाणारा पहिला खेळाडू ठरला. धवन (१ धाव) रीस टोपलीकरवी जेसन रॉयच्या हाती झेलबाद झाला. यानंतर लयीत दिसणारा कर्णधार रोहित शर्माही बाद झाला. चार चौकारांच्या मदतीने १७ धावा करणारा रोहितलाही रीस टॉप्लीने पॅव्हेलियनमध्ये पाठवले.

दोन विकेट पडल्यानंतर विराट कोहलीकडून अपेक्षा वाढल्या होत्या, पण कोहलीही टॉप्लीच्या चेंडूवर जोस बटलरला कॅच देऊन बसला. कोहलीने २२ चेंडूत ३ चौकारांसह १७ धावा केल्या. कोहली बाद झाल्यानंतर सूर्यकुमार यादवही १६ धावा करून पॅव्हेलियनमध्ये परतला, त्यामुळे भारताची धावसंख्या ४ बाद ७२ अशी झाली.

…मग पंत-हार्दिकने चमत्कार केला

७२ धावांवर चार विकेट पडल्यानंतर ऋषभ पंत आणि हार्दिक पंड्या यांनी १३३ धावांची भागीदारी करून भारताला सामन्यात पुनरागमन करून दिले. हार्दिकने ५५ चेंडूत १० चौकारांसह झटपट ७१ धावा केल्या. ऋषभ पंत ११३ चेंडूत १२५ धावा करून नाबाद राहिला. पंतने आपल्या खेळीत १६ चौकार आणि दोन षटकार मारले. पंतचे हे एकदिवसीय आंतरराष्ट्रीय क्रिकेटमधील पहिले शतक होते. दोघांच्या फलंदाजीचा परिणाम असा झाला की भारताने ४७ चेंडू शिल्लक असतानाच लक्ष्य गाठले.

इंग्लंडकडून बटलरने अर्धशतक झळकावले

नाणेफेक हरल्यानंतर प्रथम फलंदाजी करताना इंग्लंडचा संपूर्ण संघ ४५.५ षटकात २५९ धावांवर गारद झाला. इंग्लंडकडून कर्णधार जोस बटलरने सर्वाधिक ६० धावा केल्या. त्याचवेळी सलामीवीर जेसन रॉयने ४१ आणि मोईन अलीने ३४ धावा केल्या.

याशिवाय क्रेग ओव्हरटनने ३२ आणि लियाम लिव्हिंगस्टोनने २७ धावांचे योगदान दिले. भारताकडून हार्दिक पांड्याने शानदार गोलंदाजी करताना चार बळी घेतले. युजवेंद्र चहलने तीन आणि सिराजने प्रत्येकी दोन गडी बाद केले.

न्यूज अनकट प्रतिनिधी: ईश्वर वाघमारे