नवी दिल्ली: राज्यात सत्ता स्थापनेबद्दल महाशिवआघाडीचे सरकार स्थापण्याबद्दलची शक्यता फेटाळून लावत शरद पवार यांनी महाशिवआघाडीची हवा च काढून घेतली आहे. यामुळे पुन्हा एकदा शिवसेनेच्या सत्तास्थापनेबद्दलच्या शक्यतेला आणि प्रस्तावित महाशिवआघाडीला सुरूंग लावण्याचा प्रयत्न पवारांनी केला आहे. अशी चर्चा आता सुरू झाली आहे.
सोमवारी (दि.१८) दिल्लीत झालेल्या पत्रकार परिषदेत शिवसेनेसोबत जाण्याचा आमचा कुठलाही प्रस्ताव नसल्याचे पवारांनी म्हटले आहे. शिवसेना, भाजप निवडणूकीत एकत्र लढले. कॉंग्रेस-राष्ट्रवादी आणि आमचे मित्र पक्ष आम्ही एकत्र लढलो आहोत. त्यामुळे त्यांच्या मतांचा आम्हाला आदर करावा लागेल. राज्यातील परिस्थितीवर आम्ही लक्ष ठेवून आहोत, असेही ते म्हणाले. शिवसेना खासदार संजय राऊत यांनी सांगितलेल्या १७० या आमदारांच्या संख्याबळाबद्दल त्यांच्या विचारले असता हा प्रश्न शिवसेनेला आणि राऊतांना विचारा असा टोलाही त्यांनी लगावला.
