उशिराने दाखल झालेल्या नोव्हेंबर महिन्याच्या धान्याच्या वितरणात आता ई-पॉस मशीनच्या तांत्रिक बिघाडाने मोठा अडथळा निर्माण केला आहे. शहरातील रेशन दुकानांवरील ई-पॉस मशीन्स (e-POS machines) वारंवार बंद पडत असल्यामुळे आणि सर्व्हर डाउनची समस्या कायम असल्यामुळे धान्य वाटप पूर्णपणे ठप्प झाले आहे. परिणामी, गरजू नागरिकांना रिकाम्या हाताने परतावे लागत असून, रेशन दुकानांसमोर त्यांची लांबचलांब रांग लागत आहे.
महिन्याच्या सुरुवातीपासूनच ही तांत्रिक अडचण सुरू आहे. फिंगरप्रिंट पडताळणी न होणे, वितरण अचानक थांबणे यांसारख्या समस्यांमुळे लाभार्थी संताप व्यक्त करत आहेत. वितरण कधी सुरू होईल याची वाट पाहत नागरिकांना अनेकदा हेलपाटे मारावे लागत आहेत. या समस्येमुळे ग्राहक आणि दुकानदारांमध्ये वाद होण्याचे प्रकारही वाढले आहेत.
पिंपरी, निगडी आणि भोसरी या तिन्ही विभागांतील ४,९३,८७३ लाभार्थ्यांसाठी नोव्हेंबर महिन्याचे धान्य उपलब्ध झाले आहे. तरीही, शहरातील ४८८ टन ज्वारीचा पुरवठा काही दुकानांमध्ये अजूनही सुरू झालेला नाही. रुपीनगरसारख्या भागातील नागरिक ज्वारी वाटपाबाबत प्रश्न विचारत आहेत, पण दुकानदारांकडून ‘लवकरच मेसेज येईल’ असे उत्तर मिळत आहे.
ऑल महाराष्ट्र रेशन दुकानदार संघटनेचे खजिनदार विजय गुप्ता यांनी ‘धान्य येऊन दोन दिवस झाले, पण मशीनच्या तांत्रिक बिघाडामुळे वाटप थांबले आहे.
समस्या दूर होताच ते पुन्हा सुरू होईल,’ अशी माहिती दिली. मात्र, वारंवार तक्रारी करूनही पुरवठा विभाग यावर कायमस्वरूपी तोडगा काढत नसल्याने नागरिक आणि दुकानदारांमध्ये तीव्र नाराजी आहे. नागरिकांनी मागणी केली आहे की, या यंत्रणेबाबत पुरवठा विभागाने तातडीने ठोस उपाययोजना करावी.
न्यूज अनकट प्रतिनिधी: सोनाली तांबे
